أرق الديجيتال

السلام عليكم ,,, يقول المثل لاجت الاجازة وسافروا اهلك وصرت في البيت بروحك مالك الا الديجيتال وفي رواية الديقيتال  ...جت اجازة الصيف وابوي جمع اخواني كلهم وانطلقوا الى ديرتنا قال لك الحين بيمشيهم وع يا زينها من تمشية ويقول والعهدة على الراوي اللي هي  أمي انهم  بيروحون من ديرتنا على جدة على طول ..ايه هين بالمشمش . طبعا اعزائي القراء بتتسائلون انا ليه بقيت بروحي في البيت لاني عندي  تيرم صيفي طبعا من كثر المواد اللي حملتها ..المهم ماعلينا وعلى قولة عبدالحليم الاطرش مابلاش نتكلم في الماضي ..الحكي في الفايت نقصان في العقل . وانا ولله الحمد عندي شوية قريشات يعني حوالي الفين ريال ..وجلست احتار ياربي وش اسوي ياربي وش اسوي قلت بس يا ولد يا جوّال يا ديقيتال وقمت احوسبها في راسي الجوّال سكبة ورزّة بس مصاريف  وتكاليف ما تنتهي يعني على قولتهم تفرط السبحة  قلت يا ولد بلاها شكلك مالك الا الديقيتال وبالفعل رحت لمحل دشوش  وادخل والقى لي الخبير الهندي مرتز ويسألني : ايس يبقى سديق ..قلت له : ابي اركب ديجيتال ..رد علي : ايس ديزيتال انتا لازم يهدد ايس يبقى ..كسير فيه ديزيتال اراب سات نيل سات هوت بيرد هازا وازد كويس هوت بيرد كيزا ...قلت له :  وجع ثلاث اقمار من وين باجيب حقهم (متعود على الدشوش القديمة) رد علي ..قال لي لا سديق هازا كله في دس واهد يمكن كل فرق مية ريال بس قلت له يعني كويس ولا تصرف بضاعتك علي رد علي وهو معصب : ايس  هازا سديق انا في ينسه (ينصح) انتا,, انتا ما يبقى خلاس مافي مشكله قلت له لا لا كل شي الا زعلك طال عمرك موافق بس كم حقه قال لي 1600 ريال وبعد مكاسر ساعتين وانا اقول له يا عم ارشد وطال عمرك لين قبل يخليها 1500 ريال ( على فكرة ترى الهنود والباكستانيين طيبين انفخهم يسوون لك تخفيض ) ورحنا السطح وهو يشتغل وانا اغني له يا ليل يا جامع على الود قلبين ..وشوي ويصلح عربسات وشوي ويصلح النيل سات ..ويجي دور الهوت بيرد ..ويسألني :  مهمد انتا يبقى كلو قنوات  في  هازا هوت بيرد ..انا: اييه ترى اسمي عبدالعزيز مو محمد ...الهندي: طيب يا مهمد في قنوات كيزا وكيزا قلت له يعني كيف كذا وكذا .. قال لي : قنوات هوت هوت فيري هوت يبقى اخلي ولا احزف قلت له اجل هوت وتبي تحذف الا خلهم ووضحهم زين وخلهم بلحالهم على كتر بنشتغل عليهم في الليل  ..الا يا صديق هذي قنوات قنوات ولا خمس دقايق بنت تفتر والباقي تشفير رد علي ..يامهمد انا مافي يفهم انتا ايس في يقول واهد شانل 24 ساعة كيدا كولوا كده وواهد شانل سويا سويا سبه (الصباح )اقاني ليل هوت  وتنين شانل بس زمئه وسبت واهد مفتوه وباقي كله مسكر دئايات ..قلت له المهم زي ما قلت  لك حطهم بروحهم جم بعض وميزهم عن الباقيات وقال لي انه بيحطهم في  شي اسمه فيفوريت يعني المفضله لاتسألوني وشو لاني مدري وشو المهم تركب الديجيتال وكله بئا عال العال .وبالفعل اول ليلة قمت ابي اطلع قنوات الفيفوريت مير ماعرفت اطلعهم المهم قمت الف  في هالقنوات  ابي اعرف وش القنوات وعجزت  لا احفظ ترتيبهم اخبر قناة عجمان بعد العراق وفجاة تطلع عجمان جنب سوريا ومرة القى القناة الاولى حقت السعوديه رقم 3 وانا الف شوي القاها رقم 77 واقول في نفسي بس لو الهندي معلمني طريقة الحذف والله لاحذفها وافك نفسي من شوفتها 20 سنة قاهرتنا  نفس الشي الاخبار وأصابع الزمن والنشرة الجويه  و برنامج مع الناس  وكله كوم وعرض البرامج كوم اتابعه في الليلة ومن بكره نصه ملعوب فيه علشان حفل استقبال سموه وحفل تدشين مشروع ورعاية سموه لتخرج دفعة مدري وشو. المهم ما علينا وبعد نص ساعة لف ودوران اخيرا لقيت قناة  من القنوات الاربع اللي يفتحن النفس واتسمر عندها   وتبدى العرض بصور متطايرة ولقطات ساخنة جدا  قلت لنفسي بس ياولد انتهى زمن الافلام الموشوشة و التقطيع وشباب يبادلونك افلام  بافلام وتطلع افلامهم سكة وكله كوم وعبيد  ولد جيراننا على كثر ماغثني بيجيب افلام عربية  اخرتها جاب لنا فيلم  هنود في ملحق مظلم وكميرة  عدستها وصخة المهم ماعلينا الله يكرم النعمة.

بس عمر  الزين  (موب  اسم واحد سوداني ) ما يكمل  مرت ساعتين ونفس اللقطات يعيدونها بس كل شوي بصوت شكل مرة أمريكية ومرة أيطالية ومرة فرنسية ومرة لبنانيه ومرة مصرية وكله نفس الكلام (  انا  يا حبيبي ارتدي خيوط رفيعة ,,انتظرك لنتسلى ونلهو قليلا انا فتاة ساخنة جدا جدا اتصل بي على الرقم ) والمصرية تقول ( ياخواتشي  الحئ علي اصلي ست ولعة ماتستناش جرا ايه يا دلعادي لسة مارفعتش السماعة على النمرة دية)..انتظر يجيبون عرض ولا فيلم ولا انشالله  على الاقل صور بنيات جديدة ولا عندك احد وفي الاخير طلعت لي موجة تقول ان القناة تحولت الى المشفرة ... منتهى القهر والغثاثة وادور باقي القنوات ابي  اطلع بقية القنوات واجلس نص ساعة ومالقيت القنوات الثلاث الميزات  يا كانوا   شفروا هم  أو انا من السرعة ما انتبهت لهم .المهم جت الساعة واحدة في الليل ومن التعب حق تركيب الدش  نمت بدري وقمت اتذكر كلام البنات اللي كانوا يطلعون في القنوات وتوني غافي الا ويرن التليفون  وارفع السماعة ويطلع لي صوت بنت تقول لي هلا ..قلت هلا بك حبيبتي  .انا مستعد انتي مستعدة ..قالت لي مستعدة.. (بلهجة اندهاش بس شرهتكم على اللي فرق وقتها ) قلت لها يالله حطي يدك ..قالت لي وش يدك جعل يدك انت الكسر قلت لها  وش فيك مو انتي ساخنة قالت لي  انهبلت قلت لها يالله بس تراني اسخن منك .. قالت لي عزيز انت شارب شي قلت وتعرفين اسمي  بعد ولاجت معك كذا قالت لي وجع هيييي أنا عمتك عما يعميك ويقطع أذانيك  وش أنت تخربط انهبلت ...ولا انا اقوم من فراشي وانا مرتاع قلت عمتي وش قلت لك ..ردت علي قل  وش ماقلت مالت عليك عما يقطع نحرك وش جاك قلت لها كابوس الله لا يوريك حلمت اني في الانتفاضة وجندية اسرائيلية تعذبني واني صامد واحتسب الاجر عند الله واني اقهرها كل مادخلت علي السجن اقول لها مستعدة لتعذيبي تراني مستعد   يالله حطي يدتس ..قالت لي عمتي ماشاء الله عليك ما أحد بيحرر القدس الا انت  يا ولد اخوي المهم ابي اسئلك اهلك وصلوا ولا لا للديرة أدق على استراحتكم هناك ولا يردون قلت لها انهم وصلوا بس طلعوا يسلمون على جداني ..المهم سكرت عمتي وكأنها مو مقتنعة بكلامي بس المهم اني مشيتها عليها .. واصحى ثاني يوم الظهر من التعب وطيحة القلب والروعة وعلى طول من يوم صحيت الله لا يعاقبني لا صليت ولا شي  مسكت الريموت كونترول وقمت ألفلف بالقنوات كانه مسبوه بس ابي اطلع القنوات الثلاث اللي بالي بالكم ويالله يالله لقيت واحده منهم ولا توهم يحطون عرض البرامج والقى مكتوب  الساعه العاشرة مساءا بتوقيت مكة (صدق شين وقوي عين مالقوا الا توقيت مكة ) فيلم السهرة (انت   حبيبيي  وبس )وحاطين جنبه بين قوسن فيلم الشهر ..الحائز على جائزة هذا الشهر واستفتاء المشاهدين والمختصين... قلت بس يا ولد من الساعة  9 باانتبص (انتبص يعني بتّل يعني علق يعني جلس متنح مايحرك لو رموش عيونه ) قدام هالقنوات وكنت وقتها جبت دفتر وصرت اسجل فيه ارقام القنوات اللي  تهمني ..طبعا عارفين وش اقصد المهم  ومن الساعة ثمان ونص قمت اخذ لفة في القنوات وقلت اذا جت الساعة 9 باحط على ذيك القناة ما غيرها وانا الفلف وتوني واصل قناة السعودية الثانية (زي اختها الاولى يتناتقون في وجهك ) والا من رداة الحظ يعلق الجهاز اضغط فوق واضغط تحت ومير ماطاع الجهاز يتحرك ودقت الساعة 9 وانا ادعي الله يارب يتحرك يصير شي مير ماعندك احد وقام العرق يتصبب مني قلت والله لو يفوتني فيلم الليلة ماراح  اسامح نفسي ابد ويفتح الله علي وافصل فيش الكهرب حق جهاز الديجيتال  في لحظة ضعف ماددري كيف سولت لي نفسي اسوي هالشي الحين يعني   لو الجهاز   احترق وش باسوي بعمري صدق اني خبل بس الله ستر وقتها يوم شبكت الفيش الا ويشتغل الجهاز وماتتصورون فرحتي وقتها فرحة بيتر يوم شاف هايدي ولا فرحة عدنان يوم يشيل لينا ويطيّر الهوى فستانها ..المهم ما علينا وتو الجهاز مشتغل على القناة الثانية طبعا واحول الى رقم ذيك القناة ..واجلس من 9 وربع الى الساعة عشر قدام نفس القناة انتظر الفيلم وياليتني ما انتظرته تبون تعرفون ليه انا اقول لكم ليه  . جت الساعة عشر وبدا الفيلم على خير... شلة شباب حلوين طالعين في كشتة لبر مو بر بر قصدي غابه ..ويسولفون مع بعض وينكتون وانا اقول في نفسي بيقابلون وانيت محمل اربع بنات وبيوصلونهم وفي نص الطريق زي العادة ......(كلام وصخ مقطع ) ويطولون الشباب  في الغابة وانا اللي اتملل وبعد ثلث ساعة الا ويصلون فندق قلت بس عرفت ليه هالفيلم خذ جائزة الشهر لانهم بيقابلون البنات في الفندق مو مثل ما يتوقع الباقين في الغابة ..ولا الشباب  ياخذون لهم غرفتين كل غرفة فيها اثنين مرت نص ساعة ولاطلعت ولا بنية  (على فكرة الفيلم مترجم )   وتجي الكاميرا على غرفة طوني وتوم ويبدا توم  يسولف  على طوني ويقول له هل تعلم ماذا يفعل مارك و جورج في غرفتهما الان ويرد عليه طوني وهو نص نايم يقول  له لا قال توم انها الان يقضيان اجمل ايام عمرهما ..وانا ياعبدالعزيز اللي اشب نار واقوم اصاراخ يامخرج رح بالكاميرا على غرفة جورج ومارك الله يلعن ابوك   من مخرج ...ويقول طوني لم  افهم ماذا يعملان الان (واقول في  نفسي والله الدلخ ابوك  كل المشاهدين فهموا الا انت يابقرة ) الريسبشن حق الفندق طلع نخولي  (يعني قليل  ادب ) ودبر بنات لربعكم ...عقبالكم يالرخمة ..وشوي الا يخربها توم ويقوم يسوي اللي ما توقعته يحط يده على  شعر طوني ثم وجهه ثم  لاااااااااء باسه و...و...وتنتقل الكاميرا لغرفة جورج ومارك وهم .ووووععععع قلت ادب طلع الفيلم اللي  متسمر انتظره طول اليوم فيلم GAY.

ومنها على الحمام جلست في الحمام استفرغ نص ساعة كل ماخلصت وتذكرت توم  وهو مع طوني وواااع استفرغ من جديد فيلم قرف في قرف  الله يقرفهم حامت كبدي اجل هذا فيلم الشهر  الله يلعن ابوه فيلم ويلعنها قناة لا وعلى توقيت مكة اخ بس لو الهندي معلمني حذف القنوات كان حذفت هالقناة وريحت نفسي بس ..المهم من القرف وكثرة الاستفراغ والجوع وانسداد النفس ما صحيت الا عقب صلاة العصر على جرس بيتنا وانزل افتح الباب وانا دايخ ولا القى صديقي حمود ياحبيله معه 2 بروستد  لي وله ويقول لي علا العزي (العزي =دلعي ) في الحارة قلت له هلا  قال يالله سريع سريع افتح الملحق و جب الديجيتال بنشوفه ونتغدى جايب لك غدا على حسابي ولاول مرة في حياتي اشوف ولد بشكل غير اللي كنت متعود اشوف فيه الاولاد,,, مع ان حمود شين وقصير ومشعر بس سبحان الله صار في عيني ولا ليلى علوي وصارت عينيي تتميلحه وصرت اناظره من ورى وقدام ياربي حمود صار في عيني حليو مير اصحى من وسوسة ابليس وأقول لنفسي لا  وابليس يقول لي ياحلاتك مرقي حمود للسطح ومسوي به سواة توم في  طوني ويصحى ضميري الحي و اصرخ ذيك الصرخة لا ياحمود لا ويقول لي وش اللي لا قلت له يا حمود ما اقدر أدخلك بيتنا وانزل لك الديجيتال ويقول لي افا بدا شغل النذالة يعني ركبت الديجيتال ونسيت ربعك قلت له يا حمود لا تفهمني غلط والله ما تغيرت بس صعب اني ادخلك بيتنا الان اساسا لا و بعد انزل الديجيتال ويقول لي حمود بكل طيبته طيب يا ذا الديجيتال مابيه خلني ادخل لو في حوشكم نتغدى بس ..قلت لها ولا اقدر اخليك تدخل قال لي حمود افا وتبريت مننا يلعن ابوه ديجيتال خلاك تنسى ربعك قلت له أي والله يلعن ابوه ديجيتال يا حمود افهمني  ..قال لي اسكت بس  انسى ان في حياتك واحد اسمه حمود قلت بكل عفوية ومن يقدر ينساك يا  قطعة قال وشو قلت حمود حاول تقدر ظروفي قال لي اسكت بس انا بامشي قلت له طيب خل البروستد قال ولا تحلم به باعطيه الهنود قلت حمووووود ارجع ..وكان حمود وقتها  مشى وسرى بعيد واصك الباب وارجع لغرفتي وانا جوعان وما تحسفت على البروستد كثر ما تحسفت على حمود مو كصديق بل للاسف ومن وسوسة ابليس كقطعة للاسف ..الله يلعن ابوها قناة اخر عمري صرت اشوف حمود اللي امه وهي امه ماتطيق تشوفه  انا يصير في عيوني حلو من متى هالحكي  والله كارثة   ..استغفر الله العظيم  بس ......

المهم  في اليوم الثاني اتصلت على واحد من ربعي اسمه خالد اخبر عنده ديجيتال واجيب رقمه من  الشباب وادق عليه واقعد ربع ساعة اسلم عليه كيفك وشلونك وينك يا شيخ زمان عنك ومن هالحكي الماصل (مستحي اقول له ما ذكرتك الا  علشان اسالك عن الديجيتال )  المهم قلت له يا بو خلود بغيت اسألك  عن الديجيتال انا ركبته وابي اعرف عن القنوات اللي بالي بالك يعني قنوات نص كم ويضحك الشيطان ويقول ليي شف قناة ويعطيني اسم انجليزي قلت يابن الحلال وش شعارها قال لي علم فرنسا في وسط تلفزيون  قلت له وش فيها قالبيجيبون فيلم مسكت  الساعة 8 بتوقيت الرياض واقول له مو توقيت مكة قال يا دلخ وش بتفرق يعني المهم قلت له تكفى يابو خلود متاكد ولا بتقطني على حجر قال لي افا عليك قلت له اهم شي هالقناة تجيب بنات ولا الدعوى زي بعض القنوات لا بارك الله فيهم  افلام شاذيين قال لي افا عليك الا بنات وجروح بعد ومن الساعه سبع وربع وانا افرفر في الديجيتال ابي اطلع هالقناة ويالله يالله لقيتها ياشينها وياشين شعارها وتوني حاط عليها الا ومناظر دم وذبح قلت افا ياذا العلم فيلم مرعب مير طلعت نشرة الاخبار حقتهم واحسبهم خنت حيلي يحكون عن فلسطين  طلعوا يحكون عن قرية مسيحية في البوسنة والهرسك طاح عليها صاروخ بالغلط المهم وارتز قدام القناة ساعة وشوي وتقضي اخبارهم ويطلع برنامج الله واعلم انه برنامج اخباري فيه اثنين شيّاب مع مذيعة عجوز وتجي الساعه ثمان وهم يقرقون وانا مثل الاطرش في الزفة من رداة الحظ ما اعرف وش اللغة اللي يحكون فيها ويوم جت الساعة 8 ونص ويرن التليفون وارد ويطلع خالد ما غيره راعي الديجيتال ويقول لي اجل يالنيص (النيص  يعني شي مثل الضب يدخل في الجحور يعني يدبر عمره ) مشتاق لي قلت له أي والله وش دعوى بس وانا أخوك القناة اللي قلت لي عنها طلعت زي غصب  واحد( القناة الأولى ) اخبارهم ساعة وبعد الاخبار برنامج تحليلي ويرد علي خالد وهو فاطس من الضحك يا دلخ انت صدقت هذيك قناة اخبارية كنت استهبل عليك >>>وقتها بغيت اسطره بكف  قلت له اجل مافي قنوات قال الا اجل ليه متصل عليك علشان اسلم عليك واسئل عنك يالعزي يعني شوف  دور قناة شعارها ديك راجن على بيضة بتلقى فيها فيلم هالقناة في مثل هاليوم يجيبون افلام لك عليها  لا قصة ولا  شي بس بنت يتقطع فستانها والبطل يطيح فيها تبويس ..قلت انت متأكد قال لي افا عليك اجل ايش على العموم تو الفيلم بادي يالله بروح أشوفه  ويسكر السماعة واجلس العن فيه واقوم بسرعة ادور ذيك القناة اللي قال لي عنها ويالله يالله لقيتها وبالفعل كان الفيلم قد بدى والا ولا فيلم هندي بنت منحاشة وناس الظاهر عصابة ابوها يلاحقونها وتتعرف على شاب راعي دباب قلت بس هذا اللي الحبيب حقها واجلس اتابع الفيلم انه يجي مشهد ساخن من المشاهد اللي يحبونها الشباب وتمر ساعة ومرة ياخذها على مركب ومرة على هليكوبتر ان البطل يبوس البطلة يضمها  تقول مو   بطل الا اخوها من الرضاع وينتهي الفيلم الله وكيلكم ولا بوسة قلت في نفسي يا ولد شكل ابو خلود يقصد فيلم ثاني اللي بعد هالفيلم وارتز قدام هالقناة الا واشوف الديك يركض يركض ويرجن على بيضة وبس وتسكر القناة ولا حس ولاخبر وادق على  جوال خالد ابي احجر له بس طلع الخبيث اذكى مني وقفل جواله علشان ما أصيده  المهم صار وضعي ملطشة بين الشباب كل شوي يصير  لي مثل هالموقف ..ولا به أي حل .

واستمريت على هالحالة البائسة مرة اتحرى الاخبار من الشباب ومرات من النت وكل اسبوع اسير على الهنود اللي في محلات الدشوش تقول خوالي واسيّر عليهم ..بصراحة كنت اتحطم واتئلم ,, الله وكيلكم شهر ونص ماشفت اكثر من نص ساعة عليها الحكي وكلها بنات يرقصن بدون هدوم (هدوم=ملابس ) يعني والله الحق ينقال افلام عبيد ولد حارتنا (الهنود اللي في الملحق ) اصرف من حرقة الاعصاب والف وخمسمية ريال يا حسافتك يالجوّال لو اني شاريك مو اصرف لي بس يالله ..على فكره من المقالب اللي كلتها واحد من الشباب جاني وجلس يحلف لي نص ساعة يقول بأن القناة السعودية الاولى في قمر الهوت بيرد اذا سكرت في الليل تجي مكانها قناة ملتهبة قلت له يعني بتلعلب علي قال صدقني يالعزي مالقوا مكان للقناة الملتهبة في الهوت بيرد الا مع السعودية على العموم الموية تكذب الغطّاس ..وبالفعل اسبّر (سبّر يسبّر أي ينتظر بشغف ويراقب ) وتسكر القناة الاولى ويبدى اللي مدري وش اسمه اللي يطلع في الدشوش بس اللي كنه مجلة مدرسية واعصابي تحترق وماصار شي الى اليوم الثاني يوم بدوا ارسالهم بالمملكة هذا الصباح  لا تستغربون أذا قلت ما ضاق صدري لأني قلت لكم ان وضعي بين الشلة صار ملطشة كلا يلعب بي ولا به احد صادق الى ان تغلغلت فيني حالة احباط وبديت اقول لنفسي الله يعوض عليك يا عبدالعزيز  واكلت مقلب الديجيتال صحيح اني حاولت على بالي اتابع في هالديجيتال مباريات من المشفرات مير للاسف والله لا تعليق  عربي ولا شي شفت فريق لونه اسود واحمر يلعب مع فريق ابيض واسود على بالي ميلانو يلعب مع جوفنتوس للاسف بعد ساعتين طلع الدوري الروماني (ماعرفت الا من علم الدولة ...دلخ )قلت يابو سعود حاول تتعلم من هالديجيتال  وما غير والله ادربي راسي لي ست سنين في الثانوي والمتوسط ما طلعت الا بيس ونو و سومتايمز ومدري وش  بعد,,  يعني الحين من الديجيتال باعرف ايطالي >>>مالت علي  يعني بالعربي صار الديجيتال بالنسبة لي مو اكثر من ريموت كونترول علشان تفره من اوله لاخره يبي لك ثلث ساعة واذا كان عندك لياقة تقدر في ربع ساعة اذا ما علّق عليك  الجهاز في النص زي العادة لا بارك الله  فيه من جهاز.

لين  ما قفلت معي ووصلت لمرحلة بديت اكره  فيها الديجيتال وماصرت اهتم فيه  وبديت ارجع لربعي وبالفعل رحت لحمود بعد ما استرديت فكرتي القديمة عنه بان قصير وشين ومشعر ويالله يالله جلست أراضيه المهم الشباب بالاجماع طلبوا مني اني انزل لهم الديجيتال علشان يبون يشوفون بطولة يلعب فيها المنتخب حاولت افهمهم يا شباب ترى يبي لها كرت والكارت بالشيء الفلاني الله يسامحه  اللي حرمنا من منتخبنا صدق انه منتخب يفشل بس ولو  يبقى  منتخبنا حتى ولو انهزمنا من البرازيل  ثمانية صفر ومن اليابان اربعة صفر بس ولو يبقى منتخبنا يعني الشكوى لله وش بنسوي المهم ماعلينا  قالوا لي الشباب بأن في كروت مسروقة من السوق السوداء  طقيت صدري بكل قوتي وقلت لهم اذا كذا وعلى كلامكم كروت مسروقة ورخيصة فأنا يا  شباب و علشان عيون حمودي اشين واحد شفته بحياتي باشتري الكرت على حسابي  وبالفعل رحت للبطحاء واول ماوصلت هناك سئلت هندي وين السوق السوداء ومادريت الا الهندي ينحاش يحسبني من الجوازات ومتخفي واقعد امشي وأدور,,  يا شباب احد يدلني على السوق السوداء ولا  لقيت من يدلني عليها اخر شي شفت واحد من الشباب السعوديين يوم قلت له وين السوق السوداء ضحك وفهمني انها بيع الاشياء الممنوعة وسئلته بما اني بديت امون وين اقدر أحصل كرت علشان كاس القارات  وجزاه الله خير وصفه لي وبالفعل رحت للمحل واشوف لي هندي واسئله اذا عنده كرت علشان أشوف كأس القارات والهندي يحسب اني من وزارة الداخلية وقام يقول لي مافي سي انتا يبقا كرت روه لسيخ قلت له وش جاب طاري السيخ لاتكون منهم قال سيخ سيخ قلت له وش سيخه قال لي سيخ ساله كاميل قلت له ايه لالالا يابن الحلال لاتخاف انا انسان على قد حالي لا من وزارة الداخلية ولا من وزارة الاعلام وساعتين وانا اقنع فيه لين اقتنع وطلع لي كرتين وقال لي انتا ايس يبقا ايس هازا هديدة يعيس مئاك كتير بس كل شهر تقير شفرة انتا يزيب هذا كرت وانا ابرمز فور يو وهازا كرت ئادي بس فور ون يير  قلت ايهم احسن قال لي هديدة كدا قلت له طيب بكم ؟؟ قال لي بس الفين ريال قلت له وجع يوجعك ويقطع مصارينك قال لي هذا وازد كويس  هازا يطلع شانيلز كويس كله اكس اكس اكس XXXقلت له لا واللي يرحم والديك طوينا صفحة الماضي وتبنا الله يلعن ابوها من قنوات قناتنا الاولى تطلع بنات وهم لا حسبي الله عليهم الواحد ماصار يضمن نفسه مع ربعه قال طيب اذا انتا كزا خز كرت ون يير (سنة واحدة ) قلت له بكم قال لي بميتين ريال وبعد مكاسر وياعمي كومار واللي يخلي لك ام باتشا وافق يعطيني اياه بمية وعشرين ريال ..وبالفعل رحت اطمر لبيتنا واركب الكرت زي ماعلمني الهندي (ترى الهندي كتب لي كل التفاصيل في الدفتر خطوة بخطوة ولا لو علي والله مدري وين ادعس الكرت فيه ) وبالفعل طلعت لي باقة السيخ قصدي باقة الاوائل وشفت القناة الرياضية وانادي شلة الربع في الملحق ويبدى التحليل الرياضي ويطلعون لي الحلوين ويبدون يحكون عن المنتخب ولاعبين المنتخب وكل واحد منهم يقول الزين كله في لاعبين فريقي والشين من برا فريقي ..وشوي شوي يتطاقون ويتلاعنون حشا مو تحليل مباراة منتخب الا تحليل مصارعة حرة ..المهم تو الحكم مصفر يبدا الشوط الاول الا ينقطع البث وتصير الشاشة سوداء ونختبص كلنا في الملحق مانعرف وش نسوي المهم من رحمة الله كان عندي رقم كومار الهندي اللي شريت منه الكرت وادق عليه واشرح له القصة قال لي اسكر الجهاز واطلع الكرت بعدين ارجع ادخله واشغل الجهاز من جديد وبالفعل سويت اللي قال لي عليه وبالفعل اشتغل البث من جديد وتبدا مباراة المنتخب ومن اول خمس دقاايق قووول علينا يعني على المنتخب ومامرت ربع  ساعة الا قول ثاني وانتهى الشوط الاول اربعة صفر  لهم  .ولو بقى قدام منتخبنا شوط كامل يعوض فيه انشالله,, ايه هين هذا وجهي المهم يبدا الشوط الثاني ويسجلون قووول مو منتخبنا منتخبهم وبدا مدرب المنتخب الثاني يريح لاعبينه,,لأنه ضمن المباراة مير تنقلب الاحداث ويسجل منتخبنا هدف  وتبدى الاحتفالات في ملحقنا والمصارخ والتشجيع مير يا فرحة ما تمت ردوا علينا بسادس وسابع الحمدلله الله ستر علينا وانهزمنا بس بتسعة واحد ورجعنا للتحليل الرياضي وكل واحد من الضيوف الكرام متلطم ماتقول انه في قناة  رياضية الا في الحاير يشم خياس المجاري لاو وما يزال يصر  ان لاعبين فريقه سووا اللي عليهم مير البلا في لاعبين الفريق الثاني.المهم خلص التحليل الرياضي وسروا الشباب وانا معهم تعشيت (عشوني على حسابهم ) ورجعت لبيتنا ورقدت وتوني غافي الا ويطلع لي ذاك الشايب ويقول لي في الحلم ... يا حرامي سرقتني قلت له: انا ؟؟ قال الشايب : ايوة انتا سرقتني يا حرامي الله ينتقم منك ..قلت : يا عمي من وين اعرفك وكيف سرقتك بالله عليك جاوبني ...قال الشايب :ايوة الكرت يا حرامي مو سرقة لي ولا ايش انا ادفع فلوسي و اشتري البطولة حصريا على قنواتي وانت كذا بكل سهولة جاي تلطشها مني بكرت مسروق ومزور ..قلت له اولا يعني تبي تفهمني ان اللي سويته حرام  ثانيا الله يهديك البطولة كلها عشر مباريات والكرت حق البطولة  بألف ريال صراحة الواحد من وين يلحق عليك اما الكرت اللي جبته بمية وعشرين ريال  وللسنة كلها ويطلع قنوات  ازين من قنواتك اللي كلها مصالة في مصالة اجل احد يحط في تحليل مباراة المنتخب  اغاني جديدة وفيديو كليب  احد سمع اغنية رياضيه يصلحون منها فيديو كليب   يعني والله لو أنت مكاني كان تسوي اللي سويته و اكثر  يا شين احمد ربك ...وبدى الشايب يعصب علي  ويصارخ  ويقول حسبي الله ونعم الوكيل  يا لص انت سرقتني لازم تبطل السرقة يا لص يا حرامي عاد انا قلت في نفسي ابوك شايب الشرهة مو عليك الشرهة على اللي مايصير رجال ويقطع الحلم من نصه ويصحى اصرف له واصحى وشايب ابليس يصارخ فوق اذني يا حرامي يا لص يكفي سرقة هيّا ارمي الكرت المزوّر  قلت له هيا انت ..واجلس افتر في غرفتي نص ساعة ابي انوم وكل ما غفت عيني لقيت الشايب يتنطط في وجهي ..حسبي الله عليه ونعم الوكيل ومن ثاني يوم العصر رحت لاحد المشايخ ابي اسئله وش الحكم في الكرت المزوّر ..مير الله يهديه الشيخ ضيعني فوق مانا ضايع  الزبدة اللي طلعت بها ان الديجيتال كله حرام وفسق ...اخرتها قررت ما نكمل متابعة البطولة بالكرت المزوّر علشان افتك من هالشايب اللي يطلع لي في الكوابيس  وربعي من جديد رجعوا زعلوا مني وقاطعوني وراحوا للمقاهي يتابعون مباريات المنتخب وانا جلست بروحي في بيتنا وجنبي الديجيتال مسفط وفي كرتونة والله العظيم اني كرهته ولا صرت اطيق طاريه بس ياربي في شي مئرقني وشاغل بالي ولا ادري وماعرفته الا يوم رجعوا اهلي بعد شهرين للبيت وتوني انزل شناطهم سئلني ابوي وشلون دراستك عساك انشالله نجحت في المواد اللي حملتها ولا انا اللي اخبط بيدي على جبهتي الله يذكرك بالشهادة وانا اقول وش انا ناسي  قال اجل انت وشوله قاعد في الرياض قلت له ابد طال عمرك بس انشغلت بالديجيتال ويسئلني الوالد العزيز وشو البلية هذا وتوني شارح له انه دش و ريسيفر يستقبل فوق 200 قناة وما امداني اتم كلمتي الا ويرقى الوالد الكريم للسطح  وبيد واحده يقلع الدش (حشا مو أبو الا شمشون) ويكسره بالارض قلت له بكل بلاهه  ترى اللي كسرته موب مهم الديجيتال في غرفتي وينطلق شمشون الجبار قصدي ابوي الى غرفتي ويشيل الديجيتال بس هالمرة ما كسره في الارض الا على دمجتي (دمجتي اختصار لجمجمتي بس بلغة اهل الرياض ) صدق الدمامين قامت تقطر من راسي بس كلها كم غرزة ووقفت بس اللي صدق ارتحت منه هو ارق هالديجيتال اللي بهذلني ...نصيحيتي لكم اذا معزمين تركبون ديجيتال فركبوا على عربسات ونيل سات اما فلسفة الهوت بيرد والبانمسات والقمر الاسرائيلي فصراحة مالهم داعي وتقبلوا تحياتيي............بلاك هورس