ارفع راسك

السلام عليكم ورحمة الله وبركاته....في البدايه اعرفكم على نفسي واسمي الثلاثي ( سعودي مواطن شد بلد) , لا تستغربون تراه اسمي الثلاثي مثل ماهو مكتوب في بطاقة الاحوال الشخصيه...عارف انكم بتقولون وش هالاسم اللي يضحك بس صدقوني اسمي جنب القصص اللي صارت لي ولا شي.

كنت طالب جامعي في جامعة الهنا قصدي جامعة الملك سعود,,وبالتحديد كلية الحاسب الالي ايوة عليكم نور الكليه اللي مالها مبنى مستقل ...المهم في هالكليه شفت الصمرقع وتجرعت الاهات وشعاري كان ومايزال (آه ياقلبي ياكتاكت يامنتا شايف وساكت ) في البدايه على اني اجي بدري وان تاخرت مرة مرة اجي 7 ونص الا عمري  مالقيت موقف لسيارتي يعني الموقف  المعتاد والقريب لسيارتي  يكون يافي صلبوخ يافي الدايري الشرقي ..نحفت 20 كيلو في هالكليه وجاني الروماتيزم من كثرة المشي بس ولو لاجل العلم..صحيح اني كذا مرة حاولت اتلزق بشلة الشباب اللي معهم ستكرات بس ربكم ماكتب مثلا  مرة وتوني جاي بادخل لمبنى الكليه واشوف واحد بيوقف سيارته عند الباب بالضبط (اللهم لاحسد) واجلس ائشر له واقول له قدام وورى ويمين ويسار  قلبت هندي من اللي يمسحون السيارات ولان نيتي كانت شينه ,,كنت ابي اتلزق فيه علشان يجيب لي ستيكر مواقف ,,المهم وينزل الشاب الوسيم واخش في عينه ::السلام عليكم على اننا في نفس الكليه الا ان هذي اول مرة اشوفك ياخي ..رد علي بعنجهيه قصدي كل تواضع ...من اخوك لايكون انا ...قلت له  وانا ارقع لروحي (ياحلوي وانا ارقع لروحي) يحصل لي الشرف انك تعتبرني اخوك ..رد علي قال انشالله يصير خير الا انت في أي كليه ..قلت له يارجال انا معك في كلية الحاسب...واشوفه يتحمد ربه ويقول له بس ماني في الحاسب ..انا علوم اداريه بس وقفت سيارتي هنا علشان الظل والحين بيمرني خويي ( طاح وجهي طاح خشمي ) ..قلت له على العموم تشرفت بمعرفتك معك سعودي طالب في كلية الحاسب وامد له يدي ..قام هو بكل تواضع ومد يده وطلع بكت الدخان وسحب منه سجيره وولعها وقال لي خلنا نشوفك اجل ورجع يجلس  في سيارته.....الحين تتوقعوني طحت ولا رحت ابكي من التحطيم ابدا ابدا ولا شي عادي ....كملت طريقي ورحت للكليه ....احضر محاضرتي عند الدكتور سليمان .

اما الدكتور سليمان فهذا قصته قصة على اني ماخذ عنده 4 مقررات واحضر دايما الا والحق يقال ماعمري شفته و لا اعرف وجهه ماقد عبرنا وحضر والله لو اننا قسم البنات يطامر عندهم ..المهم في نفس ذاك اليوم توني بادخل القاعه  علشان المحاضره الا واشوف رجال كبير شوي ومحترم وسكبه بيدخل خليته يدخل قبلي من باب الاحترام ..وفعلا دخل الا ويسكر الباب في وجهي >>>فك الله خشمي من الكسر ,,طبعا فتحت الباب وتوني بادخل ..ويقول لي ذاك الرجال ..نعم خير وش جايبك ..خفت انه مراقب من الجامعه ,, قلت له عندنا محاضره هنا الله يحييك مع الدكتور سليمان (على بالي بافتن على الدكتور) قال لي ذاك الرجال واللي عنده محاضره يجي متاخر قلت له لاوالله جاي على الموعد تو الساعه 9 بالثانيه ..قال لي يعني انا ساعتي مخبطه قلت له مدري عنك انت وساعتك بس انا واثق من ساعتي ضابطها على موجز انباء mbc fm قال لي اجل الله لايهينك اطلع وتراك محروم من الاختبار ..عصبت انا عاد وتخيلوني اذا عصبت قلت ومن حضرتك علشان تطردني والله لو انك الدكتور سليمان قال لي وهو يضحك انا الدكتور سليمان واضح انك ماكنت تحضر المحاضرات ابد ابد.....والله البلشه الحين وش اقول له انا احضر دايم وانت اللي ماتحضر والا اقول له ايه ماعمري حضرت لمحاضراتك ابد,ولا اليوم الصباح  طحت من الدرجة وفقدت الذاكره ..المهم بلمت و الرجال اول مرة اشوفه  رغم ان  هذا  رابع مقرر لي معه ..وفعلا طلعت ورسبني في ترمين متتاليين الى ان خذيت المقرر وهو في اجازة وقدر الله علي ونجحت .. واستلموني في البروجيكتات (مشاريع التخرج ) ومو حلو ومو زين وناقصك كذا وحط كذا ....شفت في هالكليه النجوم في عز الظهر الى ان قدر الله علي وتخرجت ورغم اني احرث الكتب حرث واخرتها تخرجت بتقدير جيد جدا ماجا الا بحب الخشوم.

وهنا يبدا الفصل الثاني في حياتي...مرحلة مابعد التخرج.....

شايل ملفي ورايح وين ..لديوان الخدمة ..جاي من وين من ديوان الخدمه ...ياجامعة الربع تراني خريج 1419 هـ وجيد جدا وطالب حاسب آلي ...والرد اطلب ربك واصبر ...ياشباب عينووني لو في الخرخير ابوي انغث مني يعايرني كبر ودبر   يعطيني في الشهر 300 ريال بس وغيره  اطلب ربك ...مر شهر ..مر شهرين ..مر 6 اشهر ...مرت سنة وملفي من كثر الشيل والحط تقطع وكل مارحت اقدم قالوا لي جب ملف علاقي وجب وجب وتلقى 2000 واحد يقدمون على 5 فرص وظيفيه ...وطابور وتقادير واخرتها واحدا ماجاب الا مقبول ويخب وياخذ الوظيفه لان معه واسطه (احد قالي اصير تبن قصدي من عامة الشعب ولاعندي واسطه) ..وبعد السنة قلت ياولد مابدهاش  خذ حقك بيدك وادخل على اكبر مسئول وفعلا دخلت على اكبر مسئول  كان موجود وقت الدوام ..الباقين الظاهر راحوا يجيبون عيالهم,, المهم وادخل عليه وانا حافظ كلمتين باقولها له في العظم ..واقول لها ياحضرة المسئول ترى مايصير كذا والله هذا ظلم ياخي ترانا حنا من الشعب وانتم ان استمريتوا كذا كل شغلكم بالواسطة قسما بالله ان معظم الشباب بينحرفون ترا احنا امانة في اعناقكم ولاناوين تخلونا نضيع ..وانا اصارخ وازاعق ولوزي وصلوا لخشمي ويرفع الشايب (المسئول ) راسه ويقول لي سم  الله يحييك لحظة بس البس السماعه علشان اقدر اسمعك>>>>حسيت اني تحطمت ..ودي اصيح ويركب عمنا السماعه ..ويقول لي وش تقول ياولدي...قلت له انا طال عمرك خريج كلية حاسب آلي لي زود عن السنة وبتقدير جيد جدا وفي اختباراتكم الوظيفيه دايما اطلع يالثاني يالاول او يالله يالله الثالث بس ..شوفة عينك محلك سر غيري يتعين بواسطته وانا ماغير اكنس بلاطكم من كثر ما اجي واروح ..حتى ابوي الله وكيلك مل من التكفل فيني صار يقارن بيني وبين الشغاله ويقول لي هي تاخذ 600 ريال وشايله البيت فوق راسها لاامك ولا اخواتك وانت يالكابون 300 ريال في الشهر وفاق خشتك حتى بنزين سيارتك علي...تكفى طال عمرك عينوني انقذوا ماء وجهي..استروا علي الله يستر عليكم دنيا واخره ...وش قلت طال عمرك ..وارفع راسي الا وعمنا الله يسلمه يحوس بهالسماعه واسمعه يقول البطاريه فاضيه من وين فتحتها ..واصرخ فيه تسمعني ..ويرد علي ماتشوفني وانا عمك اصلح في السماعه..>>>من جد من جد بكيت وفرت من عيني الدمعه واطلع من ديوان الخدمه واركب سيارتي (الصنّي ) في شارع الوشم  وادعس طبعا اعني بادعس سرعة 100 بالنسبه للصنّي وماشي وماغير مشغل المساحات من كثر الدموع وشوي ويطلع لي في الخط شبح ازرق داخل علي من شارع فرعي ولا قدرت اتفاداه واصدم فيه عاد  تخيلوا شبح وصنّي وش الضرر انا سيارتي نصها راح وطي ..اما الشبح  ياحياتي  ماجته الا عفطه بسيطة  وانزل ابي اشوف الاضرار عن قرب ..وارفع راسي واشوف اخينا في الله لابس بنطلون وقميص وهالصلعه اللي تلق فوق راسه ويقول لي شو شو شو بك ليش عم بتسوء هيك..قلت له انت الغلطان وما امدانا اربع دقايق الا الدوريه مقبله.

ونزل الشرطي الهمام ويقبل يمنا ويقول اش جرى بالضبط والتفصيل وقلنا له القصة والشرطي عاين الوضع ويرفع راسه يم اخينا ابو بنطلون ويقول له انت ياخواجه غلطان ميت بالميت 100% مالك الا تجيب كفيلك ..ويصرخ ابو بنطلون في الشرطي ..شووو شووو خواجه انا سعودي مثلي مثلكون  لك يازلمة مابئا تعيد خواجه  ...قال له الشرطي  ابك انت سعودي زيك زينا  ..قال له ايه انا رمزي دحبال آل طرشجي من بيت آل طرشجي مابتعرفون ..قال له الشرطي وش الطشججي ..قال له آل طرشجي اصهاره ل (يطول عمره يزيد في عزه يكثر كيره يئصف عدوه  ) صاحب شركات .... والبنايه اللي هونيك بالعوليا ملكه ..وما امدى ابو بنطلون يتم هرجته  الا الشرطي وجهه تغير علبة الوان مائيه وشفته يقلب علي الا انت غلطان ياراعي الصنّي تشوف الرجال بيدخل الطريق ليه ماتنتبه له ..قلت له انا بس بس..قال الشرطي لي لاتبسبس علي ولا شي الخطا راكبك كلك ولاتحاول ..ياتصلح سيارة الرجال يا تتسامح منه ويتنازل عنك ..رحت لابو بنطلون وجلست اتسامح منه واقول واللي يرحم والديك تنازل ترى سيارتك ماجاها شي انا اللي سيارتي انعدمت  ..وقال لي ابو بنطلون شوو ماصار شي مابتشوف سيارطي اندفشت هيدي مرسيديس تعرف شوو المرسيديس جدك في حياته ركب مرسيديس ..قلت له والله اعرف انها مرسيديس وان لاجدي ولاولده ولاحفيده ركبوها ولابيركبونها ولو العين ماتعلى على الحاجب ..بس تراني ضعيف وماوراي الا الدجة وعاطل ومصروفي 300 ريال في الشهر ارحمني الله يخليك وقمت احبحب في هالصلعه (ياهالصلعه تزلق براطمي عجزت تثبت كل شوي تزلق ) المهم بعد ساعتين من الترجي والتحبحب ووافق انه يتنازل عني ..وركبت سيارتي ورحت لبيتنا.

ووقت ماوصلت بيتنا وافق وقت رجعت ابوي من العمل وانزل من السياره واسلم على ابوي ..ويمزح معي الوالد وين مستاجر سيارة كوبيه من احد اصدقائك قلت لاوالله هذي سيارتي الصنّي الا وابوي يشهق ويصارخ يالهيس الاربد  وش سويت وش صدمت به خشيت في جدار قلت له لاوالله صدم فيني مرسيديس قال لي ابوي عساك ماتنازلت بس وضيعت حقوقك قلت له انا ابدا لايمكن  هو جزاه الله خير من طيب اصله  تنازل ..قال نعم  موب تقول انه صدمك قلت الا ..قال اجل كيف قلت هو معه واسطة وراه ظهر ,,انا شوفة عينك ماوراي الا الضعوي ..قال لي ابوي المهم حط في بالك ان بتصلحها انت انا ماني مساعدك في شي,, وادخل عند امي وابتسي على كتفها وامي تقول هاه بشر عسى لقيت عمل قلت ايه وزير بالنيابه في وزارة الزراعه والنفط مادري عنتس انتي وطقم هالاخوان اللي عليتس ماعندي خال فزعه اترزز به عند هالعالم واتوظف قالت امي اجل عندي لك البشاره ...قلت خير قالت خالك لقا لك وظيفة في القطاع الخاص قلت  في صلاة امك وابوك  قصدي قولي والله قالت لي والله العظيم..خالك توه داق علي ويقول لك تروح بكرة لشركة الوطنييين اللي عند بيت بنت خالك وتقابل المدير حقهم ترى عندهم وظايف شاغره ..بس اسمع وانا امك مو اذا قالوا لك الراتب 3000 ريال تعيي ..قلت لامي  الا باعيي يا راتب 20000 شهريا واجازة شهرين وتذاكر للندن يامابي وش تقولين يمه لو يقولون راتب الف قبلت . الف ولا منة ابوي على 300 ريال .

المهم ثاني يوم اكشخ اخر كشخه والبس الثوب الرسمي ابو كبك واخذ الكبكات اللي اهدتها لي خالتي واشتري ملف علاقي جديد واروح لشركة الوطنييين  واقابل المدير قلت له انا اللي كلمك خالي عني انشالله القا وظيفة شاغره عندكم لي ...وماشفت لك المدير الا يرحب ويهلي ويقوم من كرسيه ويجي عندي ويجلس يتمقل فيني ويقول لي ديور  واديور واشك في نوايا الرجال وشوي ويقول  لي لا جسمك تمام ينفع مناسب جدا للشغل ..وبدى العرق يتصبب مني ...يوم دق المدير على السكرتير وقال له جاب ملابس الشغل ...ساعتها طاح قلبي ..غربلك الله و خالي معك وش شغل اللكاعه هذا ويدخل السكرتير المصري ومعه بدله حمرا قلت لهم وش ذااا؟؟ قال لي المدير الوظيفة الجديده سيكورتي هو خالك ماقال لك ؟؟قلت الحين حسبي الله عليكم خريج كلية حاسب آلي وبتقدير جيد جدا واخرتها سيكورتي هذي السعوده اللي مزعجينا فيها ..لاوالله كدينا خير ..وش رايكم بعد طال  عمرك اشتغل قهوجي ولا فراش ابرك يالله نوع من التجديد موب احسن...توقعت بهالحكي ان المدير بيتندم وبيستحي .. اثاري الرجال  جلس على المكتب قال لي سمعت وانا عمك (هذا عيب السعودي اذا شغلك يذلك,, من الباب للطاقه وانا عمك ) عن خريج اشتغل وزير على طول رديت عليه ايييه فييه قال لي لاتتريق تراني اتكلم جد رديت عليه حتى انا اتكلم جد الله يسلمك وشكله تذكر اللي جا في بالي وقال غير الاستثنائات انا اتكلم عن القاعده العامه ..قلت الله يسلمك  اذا لقيت قاعده تكفى علمني  ابو جيد جدا واللي ينجح في اختبارات التوظيف يصف في بيت اهله   وخريج علوم اداريه بتقدير مقبول   جايب شهادة دورة مايكروسوفت ويندوز من معهد اهلي يتعين على طول...قال لي المدير اقول بلا حكي في السياسة المهم ياولدي انت اشتغل سيكورتي الحين وبعدين تترقى مع الزمن  رديت عليه يعني اشتغل سيكورتي اذا ترقيت وش اصير حارس بوابه مرة بحبحتوها معي اصير سيكورتي اول شف بتعينوني على شهادتي وفي تخصصي ولا يفتح الله. واخير صدق ناس ماتجي الا بالعين الحمرا عينوني في مجال تخصصي ..كاتب على الآله الكاتبه ..يعني الواحد هنا يصير له طموح بعد عشر سنين يصير كاتب على الكمبيوتر ..على فكرة نسيت اقول لكم ان شركة الوطنيين متخصصة في تنظيف الشوارع وتزيينها. والراتب وبلا حسد رجاءا  2766 ريال في الشهر. مع العلاوات تصير 3000 ريال .

يعني شاب وراتبه تحت 3000 ريال والوظيفة كاتب آله كاتبه. شي يفرح صدق.وش المستقبل اللي قدامي ..بالنسبه لي حسيت ان مافي طموح ولا امل ولامستقبل ولا LBC يعني اجمع راتبي علشان اتزوج و استر على نفسي طيب ياحسره وش اوفر ووش اصرف ....والناس تخلي احد في حاله ...كل شوي يا واحد من ربعي يا من اهلي ياسعودي اشتر لك جوال معقوله سعودي في الالفية الثالثه مامعه جوال ياسعودي اعقل وخل عنك البخل والتوفير (3000 ريال واوفر منها بعد..ايه هيّن ) وطلع لك موبايل يفيدك لو احتجت له ...ولان ابليس شاطر سمعت كلام الناس ورحت للهاتف اقدم على موبايل..سالوني عائلي ولاعادي ..ولاني طول هالسنين كل همي كان الوظيفه ولافرغت لاي شي ثاني ..مدري وش الفرق بينهم ومستحي اسئل وش الفرق لا يضحكون علي ..بس قلت واضحه زي الشمس العائلي ازين من العادي مهما كان هذا عادي.قلت لموظف بكم العائلي قال ب500 ريال قلت الله يديم الرخص من عقب ماكان الجوال ب(10000) ريال حشا موخط جوال الا قطعة ارض وعلى شارعين بعد..قلت له ايه الله يخليك عائلي لو سمحت وما امداني اخلص الاجراءات الا قال لي الموظف يالله اختر 8 ارقام علشان نبرمجها على جهازك ..قلت هاه وشو ليه طيب ..وما امداني ابرمج الا سمعت ناس يسولفون يقولون هو صحيح ارخص بس احراج مالك الا 8 ارقام بس تدق عليها سئلت الموظف قال ايه بس 8 ارقام قلت وبس قال لي وبسين مو بس واحده بعد .وما امداني اطلع الجهاز ويعرفون ربعي واهلي الا بدا شغل الاحرجاجات كل واحد يقول خذ رقمي ودق علي علشان اسيف رقمك..شغل احرجات وكل من قلت له جوالي عائلي ضحك علي اللي يقول لا يالسواق واللي يقول انتا يخزن رقم مدام وبابا واللي يقول مطلعه بدفتر العائله واللي يقول خاف الله في نفسك يابو الدوانيق يزي  توفير وانا ماغير ارقع هنا واشق هناك اقول لهم الهاتف يقولون لي انه اصفى و مرة اقول اصلا ماطلعته الا علشان الوالده ..وهلم جرا بس ولو ولاسيما ومهما كان مايصير سعودي معه جوال عائلي كبيره في حقه,,وارضخ لكلام الناس اللي لابيئدم ولا يأخر واروح للهاتف ابي استبدل جوالي العائلي بجوال زي الناس  ويبتسم لي موظف الهاتف البشوش.. لاياشيخ هو دخول الحمام زي خروجه يوم ذقت حلاوة شبكتنا وروعتها تجي بالساهل بالف ريال تبي نخلي جوالك العائلي عادي ...تستخف دمك يالشيخ..قلت له هالحين مو هذا ب500 ريال وهذا ب 1500 ريال وانا بادفع الفرق ..قال لي لا ياشاطر اولا شي تعبي قسيمة فيها تطلب ايقاف موبايلك العائلي ثم ننتظر لين اخر فاتورة لك تطلع اخاف عليك مبلغ ماسددته وتبي تتهرب منه ثم تقدم طلب خط موبايل جديد  وتثبت فيه انك خالي المسئوليه من موبايلك العائلي.رديت عليه كرد أي مواطن شريف ماتبي ورقة تصديق من العمده بعد وشاهدين عيان يثبتون ان علاقتي بالجوال العائلي انتهت.واسوي اعلان في الجريده اني تنازلت رسميا عن جوالي العائلي ...تدرون وش ردي علي موظف الهاتف اللبق رمى طلب خط الموبايل الجديد في وجهي وقال لاتعطلنا  وزي أي مواطن , سعودي (اللي هو انا ) سوا اللفه الطويله وقدم على جوال جديد وعادي ولما رحت اقدم الطلب سئلوني تبي رقم خاص ولا سبيشل قلت له ياليت خاص وحلو ومميز بالله قال الموظف وهو يبتسم ابشر ويطلع لي قائمة اسعار واقراها 6 ارقام متشابهه (10000) ريال ,5 ارقام متشابهه (7000)  ريال ,4 ارقام متشابهه مدري بكم قلت للموظف عسا ماشر بتعزلون ولا شي من هالقبيل قال لي لا بس مو انت تبي رقم سبيشل  قلت له ياخوي ابي رقم زي زي أي مواطن رقم عادي يعني,, المهم بعد التعب هذا كله طلع لي رقم الحمدلله 054 وجاب بقية الارقام من 1-9 عدا الرقم اللي احبه (8)  واجمل مايوصف به رقمي انه مجموعة ارقام وواحد من الشباب يدلعه THE BUZZLE   وزي أي مواطن , سعودي لان معه جوال لابد ولازم ولاسيما وحتما يستغله في الاعمال الغير شرعيه  زي المغازل وبراتب شهر كامل طلعت لي خط جديد وطبعت لي كروت العاشق المحروم واروح للاسواق .