أنا ومعاليه الجزء الثاني

تابع لـ 902 معاك على طول

وبعد ما  اقتادوني ألى مكتب الوزير ...أنا في البداية   كنت احسبهم يمزحون يعني زي مدرس الرياضيات اذا قال  بارسلك للوكيل واخرتها  طرد من الفصل ...بس  فعلا السيكورتي شقلوني  (شقل = حمل  من ورا غصب عنه ) وخذوني يم الاصنصيل ويضغطون على زر لونه يختلف  عن بقية الازرار ويرقى بنا الاصنصيل يم  الدور ذاك الاخير  ما غيره  وتو الباب ينفتح الا  تيار هوائي بارد يصكني على خشتي وزريعات و ورود  من كل  جهة وبساط أحمر من باب الاصنصيل ممتد الى مدري وين....وأنا محمول على زنود  هالسيكورتية لين وقفوا بي عند باب كبير ومطرز   مصنوع من خشب الزان  ويفتح واحد  منهم الباب  وتنبثق روائح العود  والريحان والعطور الباريسية  وفراشات طايرة وطالعة تتمشى  بين زهور المكتب ..المهم هالسيكورتية جدعوني على الأرض وتوني أرفع راسي الا وأشوف واحد ..شكله مو غريب علي يعني أشوفه كل أسبوع مرة بس وين الله أعلم (  على فكرة ناس واجد تشوفهم في الأسبوع مرة ..أمام الجمعة و غازي صدقة ..وماجد الشبل ايام أحداث العالم في أسبوع  ...بس هذا اشوفه شوفة طياري ) ..وقمت أحكحك في راسي ياربيه اذكره يجي وقدامه ترمس مذهبة وورق يقلب فيه ...ياربييه وين وين ..المهم وانا غارق في التفكير الا وواحد من السيكورتي يقول له يا طويل العمر هذا هو اللي قلنا لك عنه الله يحفظك  تبي نقطعه ولا نجلده ولا وش تآمر به طال عمرك ...و أنا سمعت طال عمرك من هنا وعظامي صارن يتنافضن ويتصاككن  يا شباب مرة واحدة لطويل العمر وش سويت لكم ودوني للشرطة المباحث ان كبرت كبرت الاستخبارات بس تزعجون طويل العمر فيني هو فاضي لي اساسا ..ويرد علي السيكورتي : أقول انثبر بس تراك في مكتب وزير الاتصالات لا تتكلم لين طال عمره يأذن لك ,,:::أنا: وزير الاتصالات ايه قل كذا من أول طيحت قلبي الله يطيح قلبك راح فكري لشي ثاني  ..وأنا اقول ياربي ويني شايفه فيه ..الترمس اللي عنده موب غريبة علي ..ياحيالله معالي الوزير وتوني امد يدي ابي اسلم عليه الا ما وعيت الا بكف من السيكورتي وييييز طعع صقعت بالجدار بيني وبينكم لولا الجدار كان ما تردني الا جدة ..المهم أشر طويل العمر بأنهم يجلسوني على الكرسي اللي قدامه وعلى يميني وعلى يساري اثنين سيكورتي واحتسى طويل العمر فنجال القهوة حقه ثم قال لي: وش اسمك ؟:::أنا: عبدالعزيز طال عمرك ويدلعوني زيزووو  وأحيانا عزيّز وفي الانترنت ينادوني بلاكي والوالد الله يحفظه ويسلمه اذا زعل مني ولا اذا اشتهي يعطيني طراق بناديني ب ضيراط ( ضيراط  قسما بالله مدري وش معناها بس اكيد شي موب زين) و أنا طال عمرك من مدينة الرياض ومدينة الرياض الله يسلمك عاصمة المملكة العربية السعودية وتقع في ماسطة المملكة يعني في النص ::::طويل العمر: وش تقصد قالوا لك ما اعرف وين الرياض ولا بتعطيني درس في الجغرافيا:::أنا:لا بس مثلك خابر الله يسلمك انه لازم من وقت لآخر  على الواحد انه يتذكر الجغرافيا صح ولا لا :::طويل العمر: وضّح كلامك وش تقصد :::أنا: والله يا طويل العمر ,, طويل العمر اللي قبلك الله يحفظه اينما كان ويسدد خطاه قد طلع في التلفزيون أول ما طلع الجوّال و اتصل مواطن مخفة يصدق كلام المسئولين وسئله هل الرقم اللي طلع من الرياض اتصاله بالرياض راح يكون ارخص من أي مدينة أخرى فأجابه أكيد وطبعا وهذا مما  لاشك فيه بس اصبروا لين نصلح النظام ..وبعد سنة وفي التلفزيون بعد ونفس المذيع ونفس الديكور اتصل مواطن الظاهر انه ولد عم ذاك المواطن ما غيره وسئل نفس السؤال ومتى بيطلع النظام ...المهم ما أطيل عليك يا طويل العمر أن طويل العمر اللي قبلك  هب في ذاك المواطن وقام يقول لا ولا يمكن أساسا المملكة  بلد واحد وأذا سوينا زي مايبون المواطنين فمعنى هذا أننا نسعى في التفريق بين أرجاء هالوطن الحبيب ....عرفت يا طويل العمر الحالي ليه أذكرك بدرس الجغرافيا على قولتك لأن طويل العمر السابق الظاهر أنه ضعيف في الجغرافيا :::طويل العمر: شوف كلام فاضي ما أحب  أنت عارف اني جبتك هنا علشان اللي سويته وأنك تسللت ألى مكاتب الموظفين وتتطلع على أسرار شركة الاتصالات ..بالله بأي حق تسوي كذا ::::أنا: والله يا طويل العمر صراحة هالشي صار غصب عني والله الوالدة الله يحفظها طلعت فاتورة جوّالها بالشي الفلاني وحاولنا نستفهم من (902) بس ماحد الله يسلمك عبرنا حشا يا صلاة يا طناش يا واحد يقول حتسي فاضي رح سدد  الفاتورة أول ثم تعال اشتكنا  طال عمرك هذا حكي يرضي الله ورسوله..مما استفزني و حطّ ثلاثة أسطر تحت استفزني  فخلاني  أروح لمقر شركتكم وحصل اللي حصل بس هذي كل السالفة .::::طويل العمر: ولو كان كتبت خطاب  لأي مسئول في الشركة  ياخي احنا حاطين صناديق للشكاوي بالله وشوله حاطينها زينة يعني :::أنا: اييه صناديق الشكاوي هذا بلى أبوك يا عقاب أول مكان يتنظف في شركتكم هو صندوق الشكاوي ثانيا أبن أمه مراجع يقرب يم الصندوق والله ساعتها ان يطلعون الشباب الشيب في راسه هذا الناقص في وسط دارهم ويشتكيهم..بس  هذا مو معناه أنكم لا سمح الله لا سمح الله حاطين هالصندوق تلعبون على الخلق بس يعني حطيتوا صندوق هذي بركة انشالله بعد عشر سنين تسمحون للمواطنين انهم يساهمون في هالصندوق بارائهم :::طويل العمر: شكلك تستخف دمك وش رأيك انك تروح تبتسم مع الشباب شوي تراهم أكيد بيوسعون صدرك :::أنا: لا لا لا يا طويل العمر الله لا يجيب الزعل بينك وبيني وعلى قولة المرحوم طلال ما دام معاي الوزير مالي ومال السيكورتي ...أنا تحت أمرك طال عمرك بس تكفى هالشباب يبقون بعيدين :::طويل العمر: أجل اركد ..ممكن تفهمني وش اللي مضيق صدرك في شركتنا ::::أنا : حرام عليك تبي شي واحد مضيق صدري من شركتكم يا طويل العمر يعجز الكلام في وصف شركتكم بس اذا تبي عقدة لساني تنفك واقدر افضفض بالحكي ياليت كوب هوت شوكولات وثانيا الشباب يطلعون .....وبالفعل نفذ  طويل العمر اللي طلبته منه.

وبعدين التفت معالي الوزير وقال لي : يالله الآن سويت لك اللي طلبته مع اني ما كنت مجبور بس أتوقع جا دورك علشان تجاوبني على سؤالي :::أنا: والله يا طويل العمر بصراحة بصراحة ومافيناش زعل شركتكم مدري وزارتكم اللي هي  لها شقوق ما تتنترقع من أول شغلكم من خشومكم كأنكم تكدون على الخلق ..يعني نص الرياض يا ما عندهم تليفونات يا خطوط زي وجيههم الواحد   اذا بيكلم جدة  الصوت يقطع ويوشوش .. لين قضبتوا الخيط والمخيط لشركة أمريكية قلنا انشالله خير ..صارت الدعوى حواق ناس عندهم 5 خطوط وناس طلعت روحهم على خط ولا حصلوا ..وكل هذا والناس منثبرة وماكلة تبن ...طلعتوا بالبياجر الناس تفائلوا خير ..الا طلعت شر بعينه وعلمه ديرة طول بعرض ما تطلعون الا 100000 بيجر عسا ما شر البحرين وهي البحرين طلعوا نص مليون بيجر ربع مليون لهم ونص مليون احتياط يعني مواطن يضيع بيجرة الا البيجر الاحتياطي ثاني يوم الصبح في وجهه....وشوي شوي قلتوا بنتقدم حطيتوا كباين وقلتوا السعودة وياحيالله الشباب الطموح ..المخفات تناتقوا ..وفتحوا لهم على كذا كبينة  ما تموا السنة طلعت بطاقات الاتصال ..وجلسوا اهل الكباين يقشرون بصل ..بس الجميل يا طويل العمر أن المواطن السعودي تعود الحركات النص كم منكم  يعني ما صاروا يزعلون ولا يعتبون ولا شي الواحد بينه وبين نفسه ياكل تبن وتلقاه يضحك من زين الطبايع :::طويل العمر: حلو طيب وش اللي تغير :::أنا : والله يا طويل العمر هالمآخوذ الجوّال اللي خبص الديرة فوق تحت جلستوا ست أشهر تقولون جا الجوّال راح الجوّال الشركة اللي بتركبه نست ماصورة والشركة المقاولة ركبت سلك غلط بس سبحان الله  كل شي أجلتوا فيه  الا رسوم الأشتراك  فتحتوها من أول يوم  وماشاء الله مو ألف ولا ألفين الا ضرب عشرة آلاف ريال ..يلعن أبو ابليسكم طيحتوا سوق الاراضي والسيارات ..بالله  في ذمتك يا شيخ  عمرك سمعت عن ديرة قيمة الجوّال فيها عشرة آلاف ريال لا ومن دون الجهاز ..طيب ياخي استحوا على وجيهكم وعطوا كل مواطن شاحن اسمه دفع عشرة آلاف ريال على خط جوّال وشاحن ..ماعندكم شاحن على الأقل العبوا عليهم قولوا لكل مواطن 100 دقيقة ببلاش موب مية خمسين ..مو سرقه عيني عينك..:::طويل العمر: مع أنها من مسئوليات سلفي السابق بس اأقدر اقول لك اننا كنا محتاجين فلوس علشان نغطي تكاليف الشبكة ولا من وين نجيبها هاااه قل لي من وين :::أنا: يا طويل العمر القطاع الخاص قاموا يلمحون لكم اخشرونا معكم خلونا نساهم  ..أمريكا  بريطانيا دول الخليج غربلك الله :::طويل العمر : نعم وش قلت غربلني الله :::أنا : اؤاؤ سوري غلطة مطبعية قصدي هداك الله مصر وهي مصر اللي نفذ المشاريع القطاع الخاص ,يعني مو تطقون صدوركم يالوزارة في مجلس  الوزراء قدام باقي الوزارات يعني أننا نعرف نسوي مشاريع  ..واخرتها الطقة في رووس الضعوف أجل جوّال بعشرة آلاف ريال وين احنا وش ذا الجوّال والله لو انه يطلع صورة اللي يكلمك ..لا ومانيين علينا ترى الجوّال بيطلع رقم المتصل يا شيخ كأنكم  انتم من نفسكم  مسوينها  ادعوا بسلامة الشركة الأمريكية ..حتى يومها قالوا في السي ان ان أن مسئول كبير في شركة الاتصالات يناقش مع الشركة المقاولة أذا هالخدمة عليها تكاليف زيادة ولا لا ::::طويل العمر : يا أخي لاحمدا ولا شكورا احمد ربك ترانا سبقنا دول ثانية في تقديم خدمة الجوّال ..بس كأنه مو مالي عينك مدري وش  تبي الله يسلمك :::أنا: لا لا ياحبيبي مو كل ما حطيتوا شي قلتوا تحمدوا ربكم .ياخي ترى حنّا مو يهود ولا بوذيين بتعلموننا وشلون نحمد ربنا ياخي صبرنا عليكم بس يودينا للجنّة على طول بدون حساب ..يلعون ابو شكلكم عفوا ياطول العمر يلعن ابو شكل الوزارة أما شكلك انت محشوم والله ...التقديم في شهر وتوزيع الشرائح في الشهر الثاني وين بتصلحونها حسب الطلب ..ياخي لو كيلو كباب كان يخلص أسرع ....والله لو مآخذين ألف ألفين كان الواحد يستحي منكم بس عشرة آلاف ريال يعني المفروض يحطها من هنا وياخذ الشريحة باليد الأخرى ...قلتوا ما استعدينا لهالخدمة أجل بالله يومكم تصورون مع رئيس الشركة المقاولة وش تسون وقتها ..المهم يا طويل العمر والله أنكم محسودين على هالشعب مايحصل لكم مثله لو تلفون العالم ...يرتفع سعر الكهرب وساكتين يلعنون أسعار البنزين ولا أحد يرمش  المكافئات تنقطع ولا أحد يقول آخ بس يا طويل العمر لا تطمعون عاد يعني اذا شعبكم عطاكم وجه ماتصيرون مرة تطيحون الميانة :::طويل العمر: ما فهمت يعني وش تقصد ؟؟:::أنا: يعني يالحبيب  ريال وستين هللة للدقيقة وين والله لو اني باشم ريحة اللي اكلمه  ما صارت الدقيقة بريال ونص  على الاقل اذا صرتم نذلين خلوها ريال ونص على الأقل الواحد يعرف يحسب كم بتكلف مكالمته وهو يقرق على التليفون هذا غير الشبكة اللي تفتح النفس اذا كلمت مع واحد على  الجوّال كانك تحكي من ماصورة  مجاري ..كل شوي تخ بخ طط واخرتها  تووت تووت ...ولا أذا قلتم وقت  الذروة عقدتوا العالم والخلق على 20 هللة بتنقصونها :::طويل العمر: قلت لك هذي اشياء كان المفروض تطرحها على سلفي السابق فهمت :::أنا : مو طرحناها الا جدعناها بس سلفك الله يسلمك  فرش لنا الأرض طحينة فهم الناس في غضون كذا شهر الدقيقة بتصير برخص الرخص و الشبكة بتتحسن واذا  طلع بعد شهر ولا اثنين في التلفزيون مع انه الله يصلحه كثر الطلعات على التلفزيون صار ولا كنّه محمد بخش أو سليمان العيسى  ( الله يقومه بالسلامة )كل ما فتحنا التلفزيون تعوذنا بالله من أصواتهم ونصبهم ..مير ما عندك احد الا كل شوي ممددين وقت الذروة لين صارت كل الأوقات ذروة ومع هذا  عندكم شعب قلبه ابيض وداج :::طويل العمر: بس لا تنسى أننا رخصنا  رسوم الأشتراك وعوضنا اللي دفعوا عشرة آلاف ريال   على حساب فواتيرهم يعني ما أظن أننا قصرنا معكم يالمواطنين هااه صكيت عليك صح؟:::أنا : يا شيخ فارق  بس :::طويل العمر: من يفارق الله يحييك ما سمعتك زين؟:::أنا : مو  انت ياخي أنت ما ينمزح  معك بالمرة أفارق أنا وأهلي كلهم بس أنت لا ..أنت العزيز أنتا أنت المهم أنتا ..بس أقصد ترى يعني  قصدكم تخفيض رسوم الأتشراك يعني بيني وبينك تراها موب لله يعني ابتلشتوا بخطوط والناس ماعادهم خبلان بيرمون فلوسهم علشان لا صاروا يتكلمون تقل كأنهم في مواصير ثانيا مع اللي التخفيض اللي أنت فرحان به  وشو يعني 3500 ريال يبقى  غالي  ثانيا يعني اللي دافع عشرة آلاف ريال الا تحجرون له وتغصبونه يكلم بها  ياخوي يمكن يبغى قروشه ..ترضى يا طويل العمر يقولون لك ماحنا  دافعين لك راتب بنعطيك بداله قيمة مكالمات وقسايم مرور لو قطعت الاشارات ..ياخي لا ترحمون ولا تخلون رحمة ربي تنزل ::::طويل العمر: بس ماعندنا فلوس واحنا محتاجين لفلوس  علشان نكمل بناء الشبكة من وين نجيب يعني نسرق::::أنا : لا استغفر الله وش تسرقون ماعاش من يقول عنكم كذا  أنتم بس تتجملون   أما تسرقون معصي...بس ابي افهم طال عمرك يعني من وجهة نظرك هل أنت ترى أن الرسوم اللي يدفعها المواطنون منطقية....وتوني أسئله الا يرن تليفون طويل العمر.

ويرفع معالية السماعة ويقول الو (بيني وبينكم طويل العمر كان راز صدره ونافخ ريشه بس أول مارفع السماعة كل شي تغير ) ...طويل العمر: مرحبا ..هلاا هلاا كيفك طال عمرك الله يسلمك ويخليك ويبقيك سمّ الله يحييك وش تآمر به .....ساعتها أنا قمت أحوسبها في راسي  أذا طويل العمر يقول للي في التليفون يا طويل العمر أجل من طويل العمر حق طويل العمر ,,أكيد انه............. ساعتها قمت وطمرت وصرت جنب طويل العمر (يعني الوزير ) وأشد السماعة منه وأقول له أبي اسمع طويل العمر الكبير طال عمره وحفظه الله من كل شر :::الوزير:  يا ولدي وش تبي أنت اترك السماعة ناوي نروح كلنا في داهية :::أنا: بس أبي اسمع حسه ياخي من زمان عنه :::الوزير: هي أنت منهو تعرف من معي على الخط يومك تنشب لي :::أنا: أكيد اعرفه طويل عمرك وطويل عمري وطويل عمر الشعب كلهم ::::الوزير: شكلك فاهم الموضوع غلط  هذا طويل عمر صح بس مو حق الشعب كلهم يعني بيني وبينك أمير بس وواحد توه في العشرينات :::أنا: افا دام الدعوة كذا خله لك اشبع به ....وبالفعل قام الوزير يكلم طويل عمره بس ذاك شكله كان يهوش عليه ..وخوينا بدى يتعتع ويقول والله يا طويل العمر راح احقق بنفسي في موضوع من أرسل لك الفواتير مع أن فواتيرك دايم مسدده وكل  الخدمات عندك الله يحييك بس أكيد انها غلطة من الكمبيوتر ....ذاك قام يهاوش صار تفاله يطلع من سماعة التليفون على المكتب ...والوزير الله يكون بعونه يتراجف في كرسيه والله انه ذكرني ببيجري اذا حطيته على الهزاز ..جلست  اقرا على الوزير قلت في نفسي عل وعسى والله اذا  نفعت قرايتي بكرة اشتهر واصير القارىء الرسمي  على الوزراء اللي يطير الجن والحسد حق الوزراء  يعني باشتهر واغتني بس ولو ما في فايدة  الوزير قام ينفض كان ماسكه خط 220 لين طويل العمر اللي معاه على الخط سكر في وجهه  وما شفت الا الوزير ينادي على مدير مكتبه وسكرتير مدير مكتبه ومدير مكتب سكرتير مدير مكتبه الله يحفظه ,امرهم بفتح تحقيق عاجل لمعرفة من الكلب ابن الكلب ابن ستين  جعري ( الجعري حيوان أشبه بالحشرة بس هذا اللي أعرفه ) اللي أرسل الفاتورة لطويل العمر وعلى أي أساس أرسلها ...بصراحة عشت وشفت كثير بس وزير منحرج عمري والله ما شفت لو معي كاميرا فيديو ارسلتها لأمريكان فنيست هوم فيديو.المهم بعد ربع ساعة..اكتشفوا أن شاب سعودي يعمل بالساعات في الصيف وما يدري عن شي أرسل هالفاتورة لطويل العمر وبالفعل تم اتخاذ اللازم مسحوا بهالشاب البلاط ثم سفروه لبيت أهله ..ورجع الوزير طال عمره يتفرغ لي من جديد.

ورجعت رزة الصدر له ولا كنّه من شوي ...مانيب قايل  ( وش يقولون عني بكرة تطاول على وزير حلاتي وانا ما تطاولت على حلاقنا اتطاول على وزير  ) ..المهم ويقول لي وش بعد يا مواطن عندك ضد شركتنا؟ :::أنا: أبد يا طويل العمر وش باقي بعد ياعمي روقنا والله لو احكي من اليوم لبكرة ماراح يكفي ولا راح يفيد بشي ::::الوزير: الا ماعندك شي تقوله اعترف اعترف والله ماعندك شي تقوله نيأ يأ أ أ ( حشا ماصار وزير ) :::أنا:لا يا شيخ أجل خذ عندك  يا قليلين الحيا عفوا طال عمرك موب ميدك ميد وزارتكم الحين المشتركين المميزين فواتيرهم بتجيهم عن طريق الايميل يا شيخ صراحة احرجتوا الأمريكان ..بس العجيب ان الفي أي بي على قولتكم زي شروا طويل العمر اللي حاتساك من شوي ماتجيهم فواتير من أساسه ..يعني بترسلونها في الايميل ...على مين تلعبها على مين يا وزير  .. واللي يدفعون يا حياتي يا تجيهم فواتيرهم على صندوق البريد يا حرك رجولك يا مال منيب قايل وطارد وراها في المكاتب أجل يا طويل العمر واحد مطلع جوّاله من تبوك وساكن في الرياض وفواتيره في مكتب الدمام وين عسى ما شر سياحة داخلية يعني ...وأشوف وجه الوزير أحمر بس استرد أنفاسه ثم قال لي : طيب وش فيها يا أخي غلطة والغلطات طبيعي تصير يعني كفرنا يوم غلطنا بس الآن على الأقل تقدر تعرف كم فاتورتك بالتليفون يعني هناك تقدم ولا لا بالعربي كل ملاحظاتك على عيني وعلى راسي بس اسئل عنها الوزير السابق ...أفحمتك بس ولا كلمة :::أنا: ايه مرة أنت جبت كفر بيّن  غربلك الله بعد غربلك الله مانيب رادها عنك المسيجات في كل العالم ببلاش  أنت الله يسلمك خليتها بنص ريال ولا من زين الطبايع  أذا حبيت تتأكد بعشر هللات ... يعني يا سيادة الوزير طويل العمر أبي أفهم يعني امريكا  وفرنسا والبرازيل والكويت والامارات  ونيروبي وجزر المالديف  حتى جزر الكناري ببلاش الا أنتم ليه ليه أبي أفهم  :::الوزير: يا أخي احنا مالنا دخل بالدول الأخرى  ثانيا يا أخي عندك شعب مهبول ما غير يرسلون رسايل في الليل والنهار ويا نكت يا حكي فاضي ياخي هالخدمة  معموله للحاجة القصوى :::أنا: اخس بس عفوا على مستواكم تقولون أما عاد يالحاجة القصوى بشويش  لا أصدقك بس ..يعني كل هالعالم غافلين عن هالشي الا أنتم يالفطينين  ..طيب أمنا بالله حطوا عليها تكلفة بس عشر هللات بالكثير عشرين موب نص حتة واحدة لا وحاطين خدمة غريبة يعني بنعلمك أذا وصلت له ولا لا يعني بالله عليك يعني ماسيج مرسلة وين بتروح  بتضيع في الهوى ولا بتتعلق المسيج على أحد أبراج الاتصالات ...وعلشانك وزير  ومترمط من شوي مرمطة على التليفون بأمشيها لك طيب يا طويل العمر ممكن تفهمني وش معرض الأرقام اللي عندكم رقمين متشابهين بمدري كم وثلاث أرقام متشابهة مدري بكم وأربع أرقام مدري بكم الا طال عمرك وش رايكم تحطون على النغمات قروش يعني هالشباب اللي طالعين لنا كل يوم بنغمة اذا رن تليفونه دفعوه على ربع مرة واحدة دام السرقة عيني عينك وش أنتم مستحين منه ومرة واحدة صراحة صراحة حطوا ضريبة عدم استخدام الجوّال :::الوزير: وشلون يعني اللي ما عنده جوّال نخليه يدفع رسوم بعد :::أنا: لاتنشق كشرتك بس من الفرحة موب قصدي كذا ..أنا قصدي يا طويل العمر اللي تجيه فاتورتين ورا بعض أقل من 200 ريال تصكونه غرامة 500 ريال ..وكأن طويل العمر الوزير عجبته الفكرة الا و يقول لي : ما تظن 500 ريال كثيرة شوي يعني النص مو كافي  والا اصبر شوي 500 ريال حلوة بس نسميها مو ضريبة عدم أستخدام الجوّال نخليها نخليها ايه لقيتها ضريبة ..حجز شبكة يعني المواطن يتحرك ويتنقل بجوّاله ويستفيد من الشبكة بس ما يكلم بها ..والله أني رهيب حتى أنت بعد يا عبدالعزيز تطلع من راسك أفكار حلوة يالله وغيره وش عندك من الأفكار الزينة.....لا تبخل علي ترى يمكن أعينك مستشار عندي::::أنا: يعني فرضا أذا صرت مستشار عند سيادتك فاتورتي بتصير مخفضة ولا الخصومات بتشتغل هاه بشرني :::الوزير: والله أنك نكتي( وهو يضحك ) أذا صرت مستشار مو تخفيض ولا رسوم خاصة الا مافي فواتير من اساسه مو بس جوالك الا جوالك وجوال المدام والوالدين والأخوان ..قال ايش مستشار الوزير تجيه الفاتورة وين احنا نلعب ولا نلعب ..بس يالله عجّل علي بهالافكار :::أنا: يعني يا طويل العمر ما عمرنا سمعنا بوزير تجيه فاتورة لا كهرب ولا موية ولا تليفونات بس يا طويل العمر وبما أن الوزير ماتجيه فبالتالي ماتجي حرمه المصون وابنائه المصونين بس طال عمرك يعني هالهلمّه اللي برا مدير مكتبك وسكرتير مدير مكتبك ومدير مكتب سكرتير مدير مكتبك  كلهم ماتجيهم فواتير لجوّالاتهم :::الوزير : والله ما أنت صاحي ( ما زال يهوجس بفكرتي ) حتى الثابت والبياجر وكل شي هذا اللي ناقص ,,,اسمع يا عبدالعزيز اللي يمون على الوزير فهو بمعنى آخر يمون على الوزارة كلها المهم عطنا من الأفكار ::أنا: طال عمرك عندي 3 أشياء باقولهم لك الأول ابي اذا خلصت كلامي أطلع بأمن وأمان يعني ماحد من السيكورتيه السنافيين يتنطط لي ثانيا أذا تبي رأيي أقول تحطون فاصل أعلاني وسط المكالمات يعني منها تكسبون فلوس الأعلان ومنها فترة المكالمات تزيد  ..بس شيلوا قرار الكفالة للنساء ترى هم اللي بيربحونكم واذا خايفين على قروشكم سهلة, يعني وين بيروحون من أيديكم بس اشرطوا عليهم قبل ما تقدم الواحدة اعرفوا ارقام اربعة من اهلها علشان أذا ما سددت تمصعون خطوطهم وأخيرا يا طويل العمر أقول لو تفرضون على المحلات اللي تبيع الجوّالات ان كل جوّال يتم بيعة تكون فيه صورت معاليكم على الشاشة يعني ماشاء الله رمز من رموز الأقتصاد الوطني وأول نغمة تكون نغمة شركتكم ولقييت لكم شعار ينفع لكل الأجيال تبي تسمعه أكيد تبي تسمعه.

(طنطنطاااا شركة الاتصالات السعودية ...في  تنظيف الجيوب مفترية  ...في حرق الأعصاب مجدية ...في التطنيش مية مية في الخدمات ...في الخدمات ....ايه في حد بينده عليّه) ::::الوزير وين تتريق يا شيخ :::أنا: لا سلامة عمرك المهم توصيني على شي والسموحة أذا سويت شي ضيق صدوركم ..واستر على ما واجهت بس قبل ما أطلع لي طلب يا طويل العمر ..طويل العمر اللي كلمك يا طويل العمر ..كأنه في الأخير عصب عليك بقوة وكأني كأني مو أكيد لمحت تفال وأنت بكرامة يطلع من السماعة بس في الأخير مرة كأن لحظة سكوت مرت ثمّ فجأة عصب بقوة وطلعت تفلة كبيرة حتى من قوتها  أنت سكّرت عينك ....بس اللي حبيت أعرفه هو وش قال لك بالضبط::::الوزير: أقول أطلع برا قبل لا اغير كلامي برااااا ::::أنا : لا واللي يرحم والديك لا تغير كلامك ولا شي بس ما اقول الا صدق من سماكم شركة الاستنزافات الدموية.....ودمتم..............بلاك هورس