السحر في الأرض انتشر
حبك ظهر
الميه جريت في الصحارى فارتوت / تجاعيد سكونى اتحركت واتلولوت / والغمازات اتكونت / وطابع الحسن اتحفر / آخر عجب.
ميدل ايست اونلاين
ما يبل ريق الورد في قدوم السحر
ويحن ع الجدب اللى طال
ويمد ايده للنهار
ويزوق البسمة اللى منسية
ف تشابيك الشجر
حبك ظهر
وكأنه شمس اتجملت لحظة شروق
عدت على المر اللي ساكن في الحلوق
وبأمر سحري قالتله احلى
فأتمر
زي الأمل
لما يعمر قلب يائس محترف
يأسه ف شرايينه انتشر
قام بدل المجرى الكئيب
بمسار يعدي فيه القمر
زى الخَضار
لما بيحضن عين ما شافت غير سواد
بعد طوفة في البلاد
فارتاحت النفس اللي تقلانه هموم
وشبعت العين م النظر
زي المطر
من غير معاد
ينزل يغطى الأرض خير
ويكون سبيل
ندعي ذنوبنا تغتفر
قلبي افتكر
هيعيش سنينه جعان يحلم بسوق العيش
بيعاني مش عارف يعيش
ما عرفشي انه
بس عايش
منتظر
الميه جريت في الصحارى فارتوت
تجاعيد سكونى اتحركت واتلولوت
والغمازات اتكونت
وطابع الحسن اتحفر
آخر عجب
حتى العيون وسعت وشافت صورة أكبر
من حدود دنيا البشر
السحر في الأرض انتشر
لكنه للحب اتوهب
يشعل ما بين اتنين لهب
لو تنطفى الشمس اللى ساكنه في الأعالي
ما ينطفي
و لا يختفي
ما دام ظهر
مروة تميم
شعر بالعامية: مروة تميم