الهوى مر ويلّوع

منذ اول اشراقة لي على الحياة وانا اعيش في داخل ظروف صعبه عيشة الحرمان ,تخيلوا بيت مافيه بنات يعني كل يوم ما قدامي الا شبّان وصراويل  طوال صراويل سنة وفنايل علاق  وسط احلام بالجيليت والامواس الله وكيلكم باستثناء الوالده تمر اسابيع ما نشم ريحة طيب  ما غير الاوامر اخوهم الصغير وعينكم ماتشوف الا ود وجب وسو وشل وحط هذا بدل الدلال  والا انواع الحلويات لقيمات وشعيريه طول السنة مو بس في رمضان....كل  هالظروف دفعتني اني مو بس اكون زي بقية الشباب  افكر بالبنات منذ نعومة اظافري الا اهيم فيهم هيامة من يوم عمري سنتيين وانا قاضب الممثلات المصريه احلام بالدور من نجلاء فاتحي وليلى علوي وميرفت امين وايام اشكل اخذ من ايام الابيض والاسود فاتن حمامة وزينات صدقي وميمي شكيب يعني ماخليت بس هذا كله ماكن حب ولاهوى ولا قدر يشبع طاقاتي الغراميه..فهجيت ابواب قلبي للمشاعر الجياشة والعلاقات الغراميه على بالي ان الهوى سهل ولا يعوق معي مالت علي وعلى اشكالي وعلى هوى يجي مني.

كل ماشفت بنت صرت انسبه واتدهول على وجهي واخش الف قصة معها, انها ارتمت على حضني واحنا على البحر بس الصدق عكس كذا كنت اندلخ و تجيني  الرجفه وانسى الحكي كله وهذي شوية امثلة من واقع حياتي ....

يوم كان عمري اربع سنين يعني ايام الدلاخه في العزايم ايام الدور الثاني بعد الحريم وقت ماتجتمع شلة البزران .و.محاكيكم فتييت طرنبه-بلح الشام- ولكن مرة في احد العزايم مدري وش خلا البنات الكبار يجلسون معنا- يعني بنات امهات اربعطعش- للباقيين من شلة البزران عادي بس انا بلمت حتى الطرنبه ماملت عيني لين قالت بنت عمي هدى لي عزووووزي ارم علي موزة  واي بزر محلي  مايفوتها فرصة بيسف الموزة لكن اخوكم بالله لان الطلب من بنت نصا صحن الفواكه وبدال مايطلع موزة كب الفاكهة كلها ومابقى في الصحن الا موزة وشاله وراح يمشي شووفوا عزيمة وارادة طفل ابو اربع سنين ولكن دردب في صحن الجلي خبط والبنات والبزارين والبنات ضحكوا عليه جلي احمر ياليته جلي اصفر....بتقولون عادي صارت وتصير طيب انا في مقتبل طفولتي ايام عمري ست  سنين وايضا في العزايم كنت معروف في العايله باحمدجميل الصغير وفي رواية اخرى ملك الانفراش ومن انجازاتي رضييت غضروف ولد خالي فيصل(واحد حلو وولد نعمه) بس مرة وفي عزيمة وفي بيتنا  يعني الارض والجمهور لي طلت بنت ماعرف منهي اسمها سوسن (في عايلتنا بنت اسمها سوسن) ومعها فيمتو وانا اللي تنحت اناظر فيها وما اسمع الا  صراخ عبدالعزيز الحقه ...قصة ..شله واتلفت مثل المسبوه وش السالفة الا ولد عمتي منفرد وقمت الحقة كني عجوز توها مصلية الضحى مافيني حيل وهم يصارخون اسرع اسرع وهنا حصلت الطامة لالالا تخافون ماقصيته سمعت سوسن طالعه مع امها وناصين  الباب الجانبي  وهي تودع بقية البنات وعينكم ماتشوفون الا النور تحسبوني وقفت وابو الشباب سجل قول ..ايه هين  الا استمريت  اجري بس راسي في جهة ثانيه وما اسمع الا طراااع طررريع طننخ ..اخوكم صقع في الجدار صرت زي النعامه اركض ولا ادري وش السالفه وطلعت لي  3 صعارير على امتداد جبهتي...كل هذا وانا احسبه شي من الفطرة الدلاخية اللي تسري في دمي ولكن مع الدخول للمدرسة صرت  واحد من المتفوقيين وذووي الهيبة في المدرسة يعني ترى مو سهله واحد يجيب في اولى ابتدائي 95 درجة من مية في الرياضيات لكن ظلت الظاهرة الغريبة تجاه البنات مستمرة في حياتي يعني جنب مدرستنا الابتدائيه مدرسة بنات وكنّا  ايام الشقاوة واحنّا طالعين من المدرسة نقابل البنات في الشارع ...رجاءا لايروح فكركم بعيد لامغازل ولا يحزنون ابد نبادل بمعاير وشتايم وبعدين تقلب حرب الشوارع ترجيم بالحصى كل العيال اللي معي والبنات اذا بدى الترجيم يروحون لثكناتهم العسكريه ويتبادلون اطلاق الحصى الا محاكيكم تلبسه الدلاخه والرومانسيه صاير عبدالحليم حافظ منذ نعومة اظافري  في وسط ميدان المعركة وانا ماسك شنطتي البنيه والحصى فوق راسي كل نهاية اسبوع اصير رجل الشاش من كثر مالفوني من شاش في المستشفيات مع اني واقولها صادق  اعجبكم في المعارك الاولاديه الاولاديه  اللي تكون في الفسحة يعنيي ابيض الوجه بس متى ماصار في الموضوع بنت مادري وش يصير لي...المهم الايام تمشي لين وصلت سادس ابتدائي  وطبعا انا دافور المدرسة الاول بالتخصص في يوم اختبار التاريخ طلبوووني اربعة من زملائي اني ادرس  معهم يقولون يبون يفهمون الماده باللله وش في التاريخ ينفهم   بس ولو لازم الواحد يحافظ على برستيجه رحت لبيت زميلي مكان الاجتماع وانا ادرس في البقر تاريخ الدولة السعودية الاولى والامام تركي بن عبدالله ومن هالمواضيع وفي نص الموضوع واسمع صوت اخت الولد صغنطووطة مايجي عمرها اربع سنين وهي تصارخ الا باروح للمقلط بادخل عندهم  (المقلط المكان اللي احنا مجتمعين فيه) والا هالمفعوصة  تدخل علينا ..اسمعوا اللي بيجي بس رجاءا لاتضحكون علي مانصت احد الا انا وتحط يدها على ركبتي والا ركبتي خرت صارت ماء وقمت ارتجف وتقول لي  انت وث اثمك؟؟رديت عليها :عب عب عععاز ععازيزي عبدالعزيز وكان في يدي كاس توت- ترى الفيمتو صار ملك العصيرات عندي من قصة سوسن اياها –وعينكم ماتشوف الا النور والتوت يتكبكب على ثوبي واللي جنبي يسالني وش سوى ابراهيم باشا- ياشيخ طير من ابراهيم باشا –واناظر فيه وشو وشو  براهي باشا براهيش باما ماصرت اجمع والنفضات تزيد لين انكب التوت على السجادة والكتاب وتضحك المفعوصة هههه وث فيييك وثخت بيتنا واروح بانضف مكان التوت  والولد راعي البيت يمسك فيني  ياعبدالعزيز خله الحين تجي الشغاله وتنظفه وانا  منكب على بقعة التوت وامسح فيها بثوبي والا المفعوصة تدنق براسها ووتطل علي وانا امسح وهي تضحك صرت انفض اكثر وخشمي بدا يسيل على ان ماعندي زكمة وشوي الا وطقيتها بكوة وعلى بال امي باصرفها ابراهيم باشا حاكم تونس ويصرخون العيال وش تونسه وانا اقول قطع عن المملكة التوت  وترد علي المفعوصة توت توت تووووت تتوووت   يعني هي تغني وانا في حالة انعدام الوزن الكلي والا ام الولد تدخل وتشوف التوت وتطق المفعوصة وتشيلها وتنادي الشغاله وعينكم ماتشوف الا النور ماكن صار شي قمت قلت لهم شفتوا اللي صار من شوي  هكذا كان  شعور ابراهيم باشا يوم جا يقابل الامام تركي بن عبدالله  كنت ابيكم تفهمون كمية الخوف اللي فيه ترى مادة التاريخ مو تصمون بس لا لازم تستوعب كل شي وتفهمه....وقتها بديت احس ان فيني شي غلط تجاه البنات بس وقتها كنت صغير وتمشي الايام واروح للمتوسطةوصرت البس شماغ اووه تطور باركوا لي  على فكرة ايام المتوسطة حلوة الواحد يمحي تاريخ البزارين من حياته يعني  في الطلعه  بدل من الترجيم مع البنات  ننطق ساعتين بعد الطلعه ننتظر يجي واحد يفحط ونصارخ  صدق العقل نعمه وفي رمضان كنت اجي وانا متلطم ذيك اللطمة اللي ماتطلع منها الا اعلى حواجبي  يعني لسان حالي يقول ياوزير التعليم فكنا ياشيخ ..المهم نرجع لموضوعنا  زي أي مدرسة متوسطة افلام وتبدال  سواليف وكل راس اسبوع واحد يجيب رقم ويقول  ذا رقم بنت خربانه وتاخذه بطلوع الروح تباشر عليه بيبسي وسندويتش بيض وفلافل وفي الاخير يصير رقم مشغل نسائي المهم  يوم الاربعا نبيعها ونخربها ونروح في سيارة واحد من الشباب لبنده وكل انواع العربجه ناخذ عربانه ونلف بنده لف اخوكم على باله تجاوز عقدته مير هين هين يالضبان شفت لكم بنتين مع  امهم ومادري وش صار فينيي  كنت مقابلهم واديور بسرعه والا  اللي جنبي عربانه ثانيه فيها حرمة  وحاطة ولدها في العربانه والا اصدمها والولد يطيح وما اسمع الا الدعاوي وياقلي الحيا والادب وعلى بالي باشيل البزر اللي طاح واسمع ضحكة بنت من اللي كانوا مع امهم والتفت عليها وابلم وتصرخ علي ام الولد اللي طاح واحرك يدي واخبط في علبة نيدو اكبر حجم وتطيح فوق الولد الضعيف  وتزيد ضحكة وبدل مادز العربانه من على الولد طيحت عربتي فووووووقه...والا شنطت امه على راسي واطيح انا بعد فوق الولد المهم انتهى ذاك اليوم في ادارة بنده وكتبوني تعهد ما ادخل بنده ابد L يعني  مو راضيه تضبط معي  وتجي ايام الثانوية والواحد يبدى ينضج في سنة اولى زي بقية الشباب في هالمرحلة نكتب رسايل أي كلام الواحد مسوي نفسه نزار قباني ونربطها بحصى ونرميها على حوش مدرسة البنات وماكنا ندري ان هذا حوش الجارس يعني مافي طالبات ...وفي الثانووي انضمييت الى جماعه ارهابيه  تنفذ خطط  ضد المدرسين ونكسر سيارتهم اللي قاهرني مدري ليه كنت اشارك معهم مع اني كنت جيدو كلهم معطيني فوق حقي بس وش اقوول ايام الفتونة والرعونة ومرة كان في المدرسة اجتماع للمدرسين قبل الاختبارات النصفية واتفقنا نكسر سيارة المدير  وتونا ناصين سيارتة بعد الطلعه  وتطلع جماعة زميله في راسهم سيارة استاذ الحاسب الموقف تازم يانتحد يانتفرق وبدت المشاورات ورشحوني ممثل عن جماعتنا وتوني رايح للمفاوضات والا بنات جيران  المدرسة ينزلون من الاوتوبيس واللي يخق بلم تنح كل شي والاخ في الطرف الاخر يقول يابو الشباب اول شي سيارة استاذ الحاسب وانا ماني يمه  يحسبني جاحده قال وين حاكني قلت هاه وشو وش تبي  والا يصرخ الاسد الباسل ويقول شكلهم يستهبلون اصلا انا مارتحت لهم من يوم شفتهم جايبين هالدافور معهم ويبدون الهجوم بس علينا ...ويكفخوننا تكفييخ ويشيلون العبدلله ويرمون به على سيارة استاذ الحاسب وافقد الوعي واصحى في غرفة الوكيل وهم يصارخون –الوكيل والمدير واستاذ  الحاسب – المجرم يا معتدي على اسااتذتك وظهري يخرخر دم  مارضوا يودوني للمستشفى الا لما يجي ابوي ويمضي على تعهد ...وفي سنة ثاني ثانوي بديت ادرك ان في مشكلة وعلي علااجها قبل لاتتازم امحق كل هذا ولا تازمت وفي ثالث ثانووي  شفت صفت كتب  في ميد- امحق ثقافة- واشوف كتاب  من ابونص وشدني من يدي عنوان( كيف تكون فالنتينو) واشتريه واجلس اقرا واقرا  والا الزبده في باب المغازل انك كما يقول الكتاب تروح للبنت وانت عارف انها تبيك محتاجتك  يعني  قل لنفسك وانت رايح لها  زي مافي الكتاب (هي تنتظرني هي عاوزاني هي بتمووت في دبااديبيي اصلي انا ايه سكرة وواد خلااصة)وانا اللي احفظها صم ولا سورة الفاتحه واروح سوق الرياض الدولي –الفيصليه حقت ظهرة البديعه – واشوف بنت مع  امها واخوها  مطوقي  يعني لا بس طاقيه  وتدخل امها واخوها وهي جلست تطالع الفترينه  اهل البديعه وصاروا يقولون فترينه  خبري بها قزازة المهم وانصا البنت وانا ماغير اقول هي عاوزاني هي بتستناني هي بتموت في دباديبي اصلي انا واد خلاصة انا واد لئئئئئططططططططططط......طرااخ اتعرقل بقوطي بيسي واخبط على خشتي على رخام السوق وارفع راسي الا علاقة ملابس للعرض تهبد فوق راسي وماصحييت الا بعد ساعتين علىحجر يمني  قصدي حضرمي بياع في احد محلات السوق وهو يطبطب علي واصرررخ واقول لا انا ماني لئطة ماني خلااص ماني حلو انا نيله ويقول ياولدي ويش جرا لك تعال بس وانا اللي اصاارخ وانسى نعالي في السوق وقتها وبس وقتها حست ان الموضوع خرج عن السيطرة الامر وصل فوق حد اني اداريه قلت اروح لطبيب مختص ويجي يوم الخميس وانتق للمركز الصحيه اللي عند بيتنا وادخل عليهم ,سلام علييكم وعليكم سلام وش رقم ملفك ...مدري وش تبي طيب عندي مشكله وابي واحد يحلها لي ...طيب وش مشكلتك ..لالامقدر اقولها المهم قلت لهم بشويش ابي دكتور نفسي وشوي وينزل  علينا وكيل المركز ويقول لي نعم ابوي امر وقالوا له يبي دكتور نفسي قال بس كذاا ويروح لمكتبه ويجيب مفاتيح العياده النفسيه ويقول لي اقلط واشرح له مشكلتي وسمعها وبعديييين قال بس كذا مشكلتك يا اخ عبدالعزيز مشكلتك انك فشخت مرة واحده انا بيني وبينكم سمعتها فصخت قلت وش افصخ قال فشخت يعني على طول بدون تدرج  يعني الواحد يبداها بالتدريج قلت له كيف يعني يادكتور قال لي انا اعلمك انت طبعا ماتعازل امك ..بغيت اقوم علييه قلت له وش تقول انت قال طيب نسيت الشغاله وش شغالته هذا كلامي قال حاول تحرحر في الشغاله بما انها قدامك 24 ساعه وبعدين فكر بالتوسع  قلت له يعني ابدا مع الشغاله كيف...؟ قال اهتم فيها تقرب منها ...طلعت وابتسامتي تملا كشرتي ورجعت للبيت ودخلت على اهلي ولا كنهم اهلي وانصا المطبخ واشوف انجيلا شغالتنا السيلانيه واقول لها كيفك انجيلا   وتناظر فيني وتضحك وتقول  لي قصدي هزت راسها لي وابتسمت قلت بس هذا الهوى اللي يسهر اللييل صدق الناس تكبر السالفه  خلاص في عرف قوانين الطبيعه انا وشغالتنا حبيب وحبيبته من جد ترى ما امزح معكم اذا كنت في الصاله وشفتها جايه شايله الغدا اطمر اشيله عنها مابقى الا هيي تتعب وبعد الغدا اتغافل اهلي وادخل للمطبخ من باب الساحه واغسل عنها صحنين وكم كاس وفي الليل اتعمد اتاخر واجيب لها عشا معي مرة شاورما ومرة ساندويش صبه وفي الويك اند وقت ما امي طالعه اجيب لها مطبق لانها تعزه .وفي ليلة امي معزومة على عرس قلت ياولد فرصة  واشتري طوق لشعرها وارقى به عليها في السطح ماتلاحظون قمت امون ولا  اتوزا في احد زوايا السطح ورا الدش لانها كانت تغسل شعرها ولاتطلع وهي فالة ذاك الشعر والزيت يقطر تقول بير الدمام 7 وكل شوي اقول لنفسي باصبر عليها لين تتنشف وتوصل زاوية السطح المقابله والا تاشر هيييييييييي خيانة تاشر لسواق جيراننا  ذاك الهوى ياضيعته ياسفا به صدمة كبيييرة  تذكرت ..لالالا لاتكذبي قد رايتكما معا  عرفت وقتها قسوة الهوى وطلعت من السطح وخبطت الطوق بالجدار وتنجرح يدي وتبدا معالم الاكتئاب خف وزني طالت لحيتي وبديت اهمل في نفسي ولاصرت اقدر اكل من طبخها الخاينة ياسفا المطبق في كرشتها المهم بدوا ربعي ينتشلوني من الحاله اللي وصلت لها وياخذوني ونطلع سوا ونتعشى برى يعني بديت استعيد بعض وزني ولوني  بدى يتفتح وبديت المح لبعض  ربعي مشكلتي الا وينط ابو دلي يقول يا سعود مالك الا المواجهه وانا اقول وش مواجهته  هالكلام كان في الجامعه يعني شاب ناضج قال  بكرة اعلمك وبينما  انا جالس ثاني يوم في الكليه اتسكع في الفراغ اللي مدته 3 ساعات ماعمري شفت جامعه فيها فراغات بين المحاضرات بالثلاث والاربع  ساعات الا جامعة الملك سعود المهم ويقول لي ابو دلي يالله قلت وين في عز الظهريه قال اركب سيارتك وماعلييك وانا ادلك  ومع شوية حواري وشكشة في السيارة الا واشوف قدام عيوني امهات البشوت والمراييل في وجهي مو وجهي يعني من زين وجهي وتطقني النفاضة واتخربط في السياقة وكل ماتفاديت مجموعه والف في حارة الا واطب في حارة ثانية وتكون اعدادهم اكبر واقابل الاوتوبيس ومن الروعه لفيت بغيت اصدم سواق ينتظر البنت اللي يشتغل عندها وانا الفلف الا ومصدر التسريب قصدي مجمع البنات في وجهي  ومن الروعه ادعس بكل قووتي ابي  الفكة وطرااخ صدمت في سيارة في اخر الحارة حسيت وقتها براحة أي والله براحة وان هم انزاح من على صدري ساعتها حتى ربعي بدوا ييئسون مني اخرتها قال لي ابو راكان  زميلي على بالنا شخصيات كل واحد ابو خرطي المهم قال ابو راكان يابوسعود انت من عينة ماينفع لها الا الجاهز قلت وشلون قال يبي لك من يقشر لك البيضة ويقطعها  من جاب طاري البيض تذكرت المطبق وتذكرت سواة انجيلا ودنقت راسي من الاكتئاب والشباب اللي معي في السيارة صاروا يقولون لابو راكان اسكت عنه خله.....المهم بيني وبينكم فكرت في كلام ابو راكان فكر في الجاهز يعني مقشرة وخالصة ومن احسن منه فيصل ولد خالي ولد نعمه ماشاء الله عليه  ولد نعمه وحلو ويفت انجليزي وساكن في التخصصي وسيارته بي ام دبليو ومعه جوال يعني واد كامل مكمل وادق عليه تليفون ....مرحبا من معاي....هلااا فيصل وشلوونك :::عفوا من معاي ::::يووه يافيصل ماعرفتني لاياشيخ ما اصدق ماعرفتني :::لاوالله من معي:::ناظر ركبتك وانت تعرف (هذا اللي قلت لكم عنه اني كسرة غضروف ركبته وراح يعالج في المانيا):::ايش انت من وايش تخربط ::::لااا حوول عبدالعزيز ولد خالتك,,,,,بغيت اقول لكم اسم امي::::ايه هلاا هلاا كيفك ياعبد:::تمام انت وشلونك وشلون خالتي وبنات خالتي ريما ومها والجازي :::بخيير يسلمون علييك:: (Lفي نفسي ايه هين يسلمون علي شكلهم والله مايعرفون من انا )  المهم يابو عبدالله طلبتك قل تم:::من عيووني وش تامر به::::يلعن ابو الياي اقول له قل تم ويقول لي من عيوني ..المهم يافيصل بغييتك تشوفني :::نعم اشوفك:::لالالالالاتفهم كذا تشوفني يعني ترقم لي تعرف لاشكل ولا سيارة وبيني وبينك مشوار اطلع من البديعه للعقاريه ولا النمر تكفى تكفى قل تم ::::::  (شكله جلس يتحمد ربه)اوكيه تم يا زيزووو بس اذكرها لي  ...يالله عطني رقمك:::افاا ماتعرف رقم بيت خالتك:::لالالا اعرفه مو هو اللي يبدا ب426 ,,,,,اما اكمله دا بعدكوا  بس كم رقمك انت الخاص :::على بالي خطير ايه قصدك تحويلتي في السنترال 9 ::لاحوول اقصد رقمك ماعندك رقم تليفون خاص بك انا مثلا عندي تليفون خاص فيني غير سنترال اهلي ::كيف يعني تبيني اروح اقول لابوي اعزلوا لي خط كان يسطرني :::وشوله ابوك رح انت  المهم خلاص كم رقم جوالك ::::J  ابتسامة ملو خشتي شققت براطمي  الله يحييك بيجر ينفع ::::لاحول مايصير كذا طيب شف يابو سعود تضمن ان ماحد يرفع التيلفون بعد الساعه 1 غيرك  رغم انها صارت موضه قديمة اننا نكتب بعد الساعه 1 بس علشانك :::تم بس الا اذا صرت حسران لازم اروح الحمام:::عبدالعزيز وبعدين::لالالاخلاااص اوعدك اني لارتز قدامه من الساعه 12 ونص انت بس تامر...... يوم ويمين ومع ثالث يوم دق التليفون الساعه 1 ونص  والقط السماعه  ..مرحبااا(يلعن ابوووه من صووت ولا فاتنحمامه يومها صغيره نااعم ويسرسح على القلب) ::: مررمررمرمرحبمرحبتين (اشتغلت النفاضه) ::: عبدالعزيز  موجود :::سم سمسم سمسمي الله يحيحيييييك  معك عبعبعبدالعزعزيز الله يسلمك :::هلاا ومسهلاا زيزو كيفك:::زيزو 20 سنة ماحد قالي زيزو  العاده  ياعزوز ياعزيز  بخير انت قصدي انتي انتي كيفكفكفككك::::ولهانه عليييييك اممممووووااااا ::::امممواا قالت لي امممووااا اسناني قاموا يتصكصكن  جزاك الله خير ::على ايش :::على الاامممواااا:::هههااااي دمك خفييف يخرب بيتك ضحكتنيي اجل خذ اممموااا اممووا امموااااا تبي زياده بس انت تامر  :::بس بس  الله يخلييك الموااصيير عندي بدت تسرب واللي يرحم والديك ما استحمل اخاف اطيح ولا اموت تراني في غرفتي بلحالي وقافل على نفسي ::::لا ههههاااي بالله وش لابس احلف عريان:::كح كح كح يمّة وش عريان وش تبي ذي لا لا بس قميص البيت:::لوووووول انا لاابسة بيجامتي الوردية الشفافه وحاضنة دبي الصغير ماودك تشوفني:::سمي وشوشووش هااه من دبه اشوفك ايه ليه اللي يجوز طال عمرك :::لاانت تحفة تحفة تحفة لازم اشوفك بكرة زين يناسبك اوكيه في العقاريه حلو:::يؤيؤ تحت امرك يعزك الله ويرفع من قدرك قولي امين قلت امين ::خلاص الوعد بكرة في العقاريه عند النافورة الرئيسة اللي عند اللفت بتشوف 4 بنات هذي انا وبنات خالتي تعال بس قل هاي يا منمن على فكرة انا اسمي منى ....منمن منمن (يعني من منى) خلاص خلااص :::اووكييه يا حياتي من جد ونستنييي تستاهل يالله امممموووووااااااااا ::::حسييت ان في شي صار فينيي من تحت صرت احس برطووبة فوق العاده....وثاني يوم اكشخ ومريت الحلاق التركي خويي وطول الوقت ونفسي تقول لي وش لك بالتدييت يابن الناس ارجع وماعليك وابليس يقول يعني كم بنت بتديتك ويكتب الله وادخل العقاريه وانصا النافورة واشوف الاربع بنات وهم يضحكون ويكركرون وشوي شوي بديت اقرب  يمهم وصرت ما احس بنفسي احس بشي ما اقدر اوصفة بس قلت لازم اكمل المسيرة واتابع الخطا والحاله تزداد سوء فقدت الاتصال بالعالم الخارجي نهائيا وتوني مابقت الا حطوات و...آآآآآآعععععععع   آآآآآآآآىعععععععع   استفرغت في نافورة العقارية وكل ماجييت ارفع راسي آآآآآآععععععععع  10 مرات مو بس البنات قرفوا كل السوق قرف وطلع  واتصلوا السكيورتي جزاهم الله خير بالاسعاف ونقلوني للمستشفى فحصوني شخلوني شخل مالقوا شي وبعدين طلعوني.....ساعتها وساعتها فقط قررت ان انشد المساعده وقررت اروح لطبيب نفسي ورحت لمستشفى خاص ورحت للطبيب النفسي وكان مصري وقصيت له القصه كلها من طقطق لسلاموا عليكواا....وقتها قال لي شوف ياله ياعباعزيز انت عارف ايه مشكلتك :::لايادكتور ولا ماكان جيتك:::مشكلتك بالضبط هي البنت الموئرفة :::وشو وش مئرفته يادكتور :::انت مش بتئول انك ماعندكش اخوات ::أي نعم:::بس هنا المشكله انت مش متعود تشوف بنات فلما تشوف البنات في المناسبات وهمّا حلوين بتحس في داخلك انهم حاجة عزييمة (عظيمة) وهايله بس لو انت متعود تشوف بنت هايفه نتنة في بيتكوا تشوفها الصبح والوساخه بتطلع منها وعيونها عاوزلها تايد ينظفها وراسها مليان البتاع ده الصغنن:::قصدك القمل يادكتور:::  اه هو ده وتشوفهاا في الليل بئميص وسخ ومتئطع ساعتها مش حتحس برهبة تجاهم :::مافهمت:::انت مش بترتبك لما بتشوف وزير ولا شخصيه هامة :::الا بس وش العلاقه:::هي  دي انت بتشوف الوزير في التلفجن وهو كمّل بس ماشفتوش في بيته وهو معفن ومراته  بتديه  بالجزمة على راسه وهم البنات بالنسبة ليك   انت زي حكاية البيه الوزير يعني انت محتاج تشوف بنات معفنه علشان تروح الهيبة اللي في جوا ئلبك منهم:::طيب انا ابي حل يعني ظنك بروح لامي وابوي اقول لهم جيبوا بنت الحين خلاص قفل باب الاكتتاب:::لائ مش الئصد بس انت روح لحد البنات العفنات ..

ومن هنا بدت رحلة البحث عن البنات العفنات ....وين اروح وين اروح ...بس قلت ياولد مالك الا عتيقة والبطحا ووشيقر وسويقة لين الله يرزقك باعفن بنت وش فيها دوا الكحه مر ويحوم الكبد  وصرت ارتز هناك كل ويك اند  صدق هالدكتور المصري داهيه ياهناك بني بالاسم يعني بس تزوير والا اصدق انهم ارجل مني صدق جلدهم غير عيونهم غير زي عيون الرجال حتى الحواجب تحس انها خشنة اثر حتى في البنات الله خلق وفرق وكل الاعراض اللي كانت تجيني يوم اشوف بنت اختفت الحمدلله بديت اتعافا بس مازلت دلخ ماعرف اغازل  صرت اروح اطيح وجهي ولادي وش السالفه وفي يوم كان حر يعني الرياض قد صارت برد زهقت وقلت بامشي بدري والا يد جلفة تطقني على كتفي مو تطق يعني تطق تطبطب بس من جلافة اليد صاير كانه طق واقول وانا معصب وعرقان وريحتي خياس خير يابو الشباب والتفت الا بنيه مو بنيه بنيه بماتعنيه كلمة بنية يعني يقال عنها مشروع بنت فاشل سميرررا كسواد الليل وطوويله اطول مني بحول عشرين سنتيمتر وتقول بطل ثقل ياولد يالله اكتب الرقم قبل ماتجي امي ...ثقل ورقم وش القصة بيني وبينكم من شاف اللي شفته يفكر يتوب بس قلت دوا الكحه مر بس نحتاجه طيّرت عيونها في وجهي وش كحته اخلص ياولد قلت ابشري طيب انتي تامرين واكتب لها رقم بيتنا ورقم بيجري ورقم بيت عمي يعني اذا مالقتني في بيتنا فغالبا باكون هناك وكتبت اسمي زياد وياليتني ماسوييتها جلست تتهجا اسمي ربع ساعه واخرتها تشرفنا يازيد (غربلك الله زياد صار زيد ) المهم شبكنا بنت قالت امي امي والا ما اشوف الا قافلة ليل مقبله قلت لها خلاص باي واركب سيارتي واطمر على بيتنا ...ومن الذكا لقطتها ان البنات مايكلمون قبل واحدة ومن 12 ونص وانا مرتز قدام التليفون وحاط البيجر جنبه تقول ام وولدها وتمر الساعه واحد وتجي ثنتين وتصير ثلاث قلت بس شكلها طنشتني وتوني بارقد ويرن التليفون الساه اربع الا ربع فجرا  والقط السماعه ....::::طق طقطنبق زيوودي :::من معاي :::ماعرفتني يازيد انا الجو:::وانا يعني البحر أي جو الله يحييك واي زيد ::لاحول مو رقمك 426,,,وبيجرك1152,,,قلت الا :::طيب وكاتب اسمك زيد::::والله اني دلخ ذكرتها قلت ايه زياد ياعيووني مو زيد:::قلت يااي لاتتكسر بس وانت تنطقها وش فيه زيد انت ووجهك::: لابس ياحياتي الي يعجبك زيد ولازياد وانشالله يزيد:::حياتي هههههاي اذوب اناا وش تسوي يابو الشباب ...-ملااحظة فرق بين صوتها وصوت اللي كلمتني  من قبل اعني منى- قلت لها ابد انتظرك :::ياهووه الولد قلب رومانسي وين وين طنبق طنبق طنبق روماانسي زيوودي روماانسي زيوودي:::لابس يعني تصدقين اني انغرمت بك وبنعومتك(ايه هين ياذي النعومة) :::وش قصدك تتريق يابن...:::لالالالالاوالله وش فيك, انتي اول انسانه في حياتي يعني اذا ما استثنيت انجيلا ومنى ::::طنبق طنبق طناابقنق انا الاولى ويرددون وراها بنات يالفا يالفااا  :::من ذولي قصدي من اللي عندك :::ابد بنات خالاتي ..انت عندك ا حد:::يعني الدنيا الفجر من بيكون عندي:::وش قصدك احنا داشرات ::لاوالله ونعم بس كنت مستغرب من سؤالك وتراني اعتذر اذا كنت جرحت شعورك::::طنبق طنبنبق شعووري شعووري الا وش شعوري ......وتمر الليلة قصدي الفجريه كلها على هالحال ....وتمر الايام وصرنا حبيب وحبيبته ..تقولون طوّل معها بيني وبينكم ما احب اتركها لين اتاكدت اني شفيت تماما  المهم بيني وبينكم كنت اعاني معها فهناك عدة فروق منها انها هي ماتدق علي الا الفجريات ودايما حولها بنات خالاتها وذبحتني بالطنبق طنبق طنبق  ومرة في ليلة اثنين  وسط الاسبوع يعني دقت علي وقالت :::زيودي اشتقت لشوفتك (تلمح لي):::: حتى انا بعد ياعمري(الله يقطع شكلك ياقبيحه)::قالت خلاص يعني متفقين قلت ايش  قالت متفقين بكرة متى يناسبك :::والله البلشة اقصد أي وقت يناسبك ياروحي وواعدتني يوم الثلاثاء العصر في سوق الحمام عند دكاكين بيع البط  والله من الرومانسيه رحت هناك وانا مشخص ومتحسف على التشخيصة ورحت هناك وتوني اشوفها الا والخبله تروفع بيدها زيودي انا هنا اناا حبيبتك سهام انا هنا وش اسوي فضيحة قدام الخلق واروح اقرب منها على بالي زي منى باقول هاي وامشي قربت قلت هاي مسكت يدي وين سيارتك بسرعه لاحد يشوفنا اللهم طولك يا روح  يعني البنت حياوية وتروح ام وجه مغسول بمرق وتركب معي في السيارة وتقول يالله مشني وش هالعله وامشيها في شوارع العليا وكل شوي تقول لي ذا الفندق الفلاني وذا قصر  الافراح  الفلاني يحق لها  كل ليله اسئلها وين كنتي تقول العرس الفلاني الحفله الانيه  على فكرة هي مفهمتني  انها طالبة في كلية علم الاجتماع أي والله افهمها ان علم الاجتماع قسم مو كليه بس هي مخشبة وتصارخ علي ...واحنا في السيارة عرفت انها درديخه بيني وبينك بديت اشفق عليها بس ولو خلاص حسيت ان العلاج انتها وصرت فل يعني كنت امر الاسواق واشوف بنات من جد بنات ولا ادوخ ولا اتاثر ولا شي ولااخفيكم سر رقمت كذا مرة بس علاقات طياري وبينما انا اهوجس قالت لي ماعندك احلام  لاني كنت مشغل لها برتني سبيرز قلت مابقى الا هالطقاقة احطها في سيارتي ..وشووو وش في الطقااقات ..والتفت عليها الا وعيونها صاروا حمر قلت لاوالله  الطقاقات على عيني وراسي بس قاهرتني احلاموه اجل تشتم ابو نورة ماايخسى الا هي –من خاف سلم-وتونا واصلين تقاطع العروبة مع التخصصي قالت زيودي ودي اعترف لك بشي قلت تفضلي ياعيوني قالت لي انا كذبت علييك في اشياء بسيطة شهقت على بالي باتاثر قلت وش هالاشياء  قالت انا تركت الدراسة وانا في ثاني متوسط  قلت اها يعني انتي جالسة في البيت عاطله قالت وهذا الشي الثاني انا مو سهام  انا سفرجل بنت الطقاقة الشهيرة ام مبرووك ماعمرك سمعت بها –وقتها حسيييت ان هم انزاح من على قلبي-وشهقت وطقتني العبره وقلت ياسهام اقصد ياسفرجل حتى انا كذبت عليك انا اسمي مو زياد انا اسمي لؤي وماني طالب في كلية التربيه انا طالب في الاداب ومادام علاقتنا انبنت على اساس خاطئ وكذب فلازم نفترق عصبت وعيونها حمر وقالت لي نزلني نزلني اقوول لك ,قلت لها من باب الذووق اصبري نرجع للمكان اللي خذيتك منه حسبتها صاملة تبي تنزل قالت طيب وبيتنا على الطريق حطني في اول الحارة ووديتها والسكون يملا السيارة وحطيتها وتناظر فينيي وتقول بتندم ياوش قلت لؤلؤ ولا لؤاي وتردع بالباب باعلى قوتها .......وكلها ايام وليالي وانسى هواك ياللي مانت غالي ولا  انتشرت في العروس ايامها اغنيه حزاينييه اسمها آآههه يالؤلؤ ياخوان  واغنية زيودييي قليل الاصل وصارت هالاغنية على كل لسان بس انا وش علي لاهو اسمي ولاكني اعرفه بالعكس  صرت خطير في المغازل صرت ارقم بنتين في وقت واحد ولا اطلق مني وطلعت خط تليفون خاص فيني  وصرت كل يوم شكل لين تعرفت على بنت غير طبعا ياحبيبي  غير اسمها شهد عاشت الاسامي صوتهاا خباال ولا صوت منى نفسه وطالبة علوم ادارية قسم محاسبة توها مستجدة ورقيقة وتفت انجليزي احسن من فيصل ولد خالي وتصيف في لندن وباريس وعطتني رقم جوالها يعني صرنا منجااا خالص خالص ياحلوها وهي تحكي تذكرت عبدالحليم وهو يقول(ليه بيئولوا الحب اسيه ليه بيئولوا سهر ودموع) المهم بعد ماغثيتهاا اني اشوفها اونلااين قصدي على الطبيعه بنوتة وش حلووها ساعتين تفكر وفي الاخير وافقت على فكرة بيتهم على طريق الامير عبدالله قالت لي ياحبيبي اللي هو انا تخيلوا,,, انا معزومة في قصر افراح في الدايري في حي اسمه السويدي  تعرفه قلت لها ايه هذا حي وعيّين حي محدوديين الدخل اللله وكبر يعني ياظهرة البديعه حي الوزاراء على غفله قالت المهم بروح هناك مع امي وبعدين باطلع لك زين قلت زين قالت لي بدري علشانه عرس صديقة امي الروح بالروح يعني باكون هناك على ثمان ونص بس لايهمك  اول ما ادخل انا وامي باطلع لك زين حبيبيييييي.....يحلفون اني من نعومة هالكلمة دخت وسرسحت  قلت خلاص ياروحي ومن ثمان وربع وانا عند القصر الا واشوف سيارتها الشبح وتنزل هي وامها ووراهم ددتسن مليان حريم وش ذا لايكون هالوانيت يتبع لهم   وتنزل الحلوة هي  وامها ويدخلون  وينزلون الحريم اللي في الوانيت  ومعهم طيران اثاريهم الطقاقات وانا ولاعلى بالي وتجيني حبيبة القلب تتمختر  كانها الملكة في مشيتها وتوها تفتح الباب الا اسمع صراخ يابنات هذا هووو لؤلؤ الخاين زيووديي الغدار  وعينك ماتشوف الا النور هجوم 13 بنت عفوا عفوا قصدي 13 طقاقة وهجوم على سيارتي كسروها ومردعوها وقبل سيارتي انا لعنوا ابو جد جدي والامورة شهد تصرخ حرام حرام ما اقدر استحمل حرام ياربي ليه تسون فيه كذا >>>>ماا اقوول ياشيين الي يحب بنت ياااي لو هي عضلات كان فزعت ليي.....ومردغت بالسلامة ولا بقا فيني ولا عظمتين صحاح على بعض  .....أي والله ما اقول الا ان الهوي مر ويلوّع

:- تم تحريرة في عامه وشهرة ويومة وساعته في مستشفى الرياض المركزي في جناح العظام 200 د من اللاب توب حقي.. بطران ولد نعمه معي لاب توب.....

ملاحظة :اللي طاح فوق راس الولد في بنده مو علبة نيدو الحقيقة علبة سمن فارم اكبر حجم بس شروط الشركة الراعية .......بااااااااااااااااااااااااااااااي