|
العودة للمستقبل |
|
وردنا هذا الكتاب (الرساله) من حفيدنا بلاك هورس العاشر طعش
في عام 2450 م يشتكي فيها الحال وسوء الاحوال وانتكاس الرعيه وامورها....ونحن
في عام 2001 م اذ نحمد الله على نعمته ان نكون في هذا العهد الزاهر من
الحياة الرغيده والمرفهه.....فرغبة من حضرتنا بلاك هورس الاول ان نطلع على
مزيد من الحقائق واستجابة لطلب حفيدنا الغالي بلاك هورس العاشر طعش فقد قررنا
فرك الخاتم المرفق بالكتاب الوارد واللذي بناءا على ما اورده حفيدنا بلاك
هورس العاشر طعش بمجرد فركة ينقل الى عام 2450 م ......بسم الله وعلى بركة
الله ..آآآآآآييييي
ويني ويني...الا انا في سيارة قصدي مركبة صغنطوطة متر في متر
و منسدح في المرتبه الخلفيه وتوني اعدل جلستي الا قدامي سواقة للتاكسي وطق
حنك بالعلكة والسيارة واقفة في محطة بنزين تملي السيارة بالبنزين والمحطة
كلها مليانه ملصقات بشرى ساره الان البنزين الجديد الخالي من مادة
البنزينييكا المتطايره واللي اثبت البحوث العالميه عن تاثيرها السلبي على
البيئة وانها تسبب تقصف شعر القردة فبازالة هذه الماده سوف يتم الحفاظ على
نعومة شعور القردة...ومادريت الا بالسائقة تقول (والله حاله ضربتنا الطفارة
في سنتيين شالوا نص البنزين ماصار يستحمل انك تشغل السيارة الا قاضي كله)..انا
عاد ماكذبت خبر انا وبنوتة بروحنا والشيطان معنا وبديت ارطن معها قلت طيب وش
الحل يا اسطه قالت شوفة عينك كل سيارة فوقها خزان اضافي...قلت الله يعينكن
بس عاد شكل سوقكن يالسواقات صعب تاخذون رجال وتودونهم وتجيبينهم السواقين
ينافسونكم ...الا وتضحك قالت أي سواقين بسم الله على عقلك ممنوع قيادة الرجال
للسيارات ...قلت لها نعم نعم وش تخربطين من متى هالحكي قالت بصراحة نقرا في
كتب التاريخ ان هالحكي من مايجي له 200 سنة يعني من زمن..قلت لها من جدك
والرجال ساكتين يعني...الا وتمسك السائقة فرامل بكل قوتها قالت لي خير انشاء
الله شكلك من الرجال اللي هابين في حركات تحرير الرجل ترى كل شي الا السياسة
اذا لك في هالمسائل تكفى انزل قلت لها لا و لايهمك اصلا ماني عارف شي عن
وقتكم هذا...الا انتي يا اسطه رايحه بي لوين قالت لي لطريق الملك فهد قلت
لها الى الحين ...(ياشينكم اذا فهمتوني غلط) قصدي الى الحين هالطريق زحمة
..قالت لي ايه اصلا لمعلوماتك انه الان اصبح بحد ذاته مزار للناس يعني شي
زي الفيصليه وبرج المملكة وعتيقة قلت الله عتيقة صارت مزار قالت وينك اليوم
عتيقه اكبر صرح تجاري في الرياض ماسمعت عن ناطحة السحاب عتيقاتو رابع اعلى
ناطحة سحاب في العالم ..قلت اجل والله شي على طاري الفيصليه ممكن تاخذيني
لهناك اذا ماعليك امر دام الوقت عصر يعني مسموح للرجال انهم يدخلون . الا
وتطقها ضحكة قالت والله انك قديييييييييم ترانا سمعنا بهالاساطير ان الفيصليه
اول مافتحوها كان ممنوع الرجال يدخلون بس اللي انا متاكده منه ان من بعد صلاة
العصر ممنوع دخول البنات الى ماتسكر الساعه 3 الفجر بس رجال وعوايل ..واخوكم
ماكذب خبر قلت لها بس هناك وديني هناك ولا اقول لك برج المملكة احسن باشوف
خلصوا منه كل ما قلنا خلاص طاحت منه حديده ..قالت لي وهي تضحك لا ابشرك خلاص
كمل كله ,,واحنا في الطريق اقصد طريق الملك فهد الا واشوف لوحة اعلانات كبيره
طرحة المرجوجة البصمة التاسعه ..للمراة الواثقة من نفسها,, وفوط سومتايمز
الرجاليه تهبك عزيزي الرجل راحة ومرونة في الحركة والتنقل, المهم لما وصلنا
لبرج المملكة الا وتحطني هناك ,,وتوني نازل للسوق الا وش اشوف بنات مشخصات
يتلزقون في الرجال تكفون دخلونا ..وتجيني بنت مشخصة وقالت لي تكفى واللي
يرحم والديك تراني مو راعية مغازل ولا شي رديت عليها لابالعكس وش فيها اذ
انتي راعية مغازل ترى المغازلجيات لهم رب ,, والقط البنية بيدي وانصا بها
للبوابة وتسالني السيكورتيايه الانسة معك قلت ايه وهزيت راسي (حامل معي
ذكريات عام 2001 ) وتونا داخلين الا البنيه فص ملح وذاب لاشفت لها اثر وتركت
بيدي رقم تقول لي فيه عهود الساعه 1 .المهم الدنيا تغيرت الاسواق صارت تفتح
النفس بنيات يبيعون وبعض المحلات لبنانيات وركبهن طالعات ركب من اللي يلقون
مع النور...بس البنات في السوق يدهرون كل واحده شكل,, اللي تلاحق عيال صغار
واللي تقترب من العيال وتسوي لهم حركات غريبه ..ومادريت الا بنت كتفها يحاذي
كتفي وتقول ذبحني حب الكبار اهل التجربه,, خل الصغار لاهلهم ..الغريبه اني
صاير الولد الوحيد اللي ياخذ ارقام ياربيييه وش صار في عيال ذاك الوقت وشوي
الا تجي مشايخات الهيئة يابنات المسلمين اتقين الله في انفسكن وراعن عورة
اخوانكم الرجال هل ترتضون هذا لاخوانكم ياشباب المسلميين اتقين الله في
انفسكم وتستروا ولتستعفف انفسكم...واول مرة في حياتي من يوم ولدتني امي اروح
سوق وبدال ما ارقم انترقم والله وناسة..بس اللي مافهمته على وقتنا في بنات
نص ونص ياخذون الارقام وسعة صدر,, بس يعني شباب هذا الوقت مافيهم احد على
جريف ..اوكيه بلعنا ان البنات يرقمون الاولاد بس مافي اولاد ياخذون الارقام
غريبة..وشوي ولا اسمع صراخ ولد من الطابق الثاني والناس يجتمعون عليه ومشيخات
الهيئة ماسكين بنت تحلف بالله والله مالمسته يمكن صدمت به بالغلط يمين بالله
والولد يبكي على كتف ابوة يقول له انها لمسته في .... اما امه فراحت تتفاهم
مع شيخات الهيئه ولولا حريم الخير كان سطرت البنت وتقول لها ترضين احد يسوي
كذا باخوك ياقليلة الادب صدق مالك ام تربيك ...والسوق يتكهرب وماوعيت الا
البنيات يصارخون اووه اووه ويتجمعون ورى العوايل وبدال مايكون صراخ ولد واحد
نص الشباب اللي فيي السوق بدوا يصارخون ونص العوايل طلعوا والرجال يقولون
لزوجاتهم بسرعه خل نطلع قبل لايصير لعيالنا شي,, ..ولاني شهم وحكمتي في
الحياة,, مع الخيل ياشقرا طلعت مع الخلق ..الا و برى بنيات اكثر من اللي
جوا انا صراحة نسيت نفسي من الفرحه تمنيت ان الحياة تستمر كذا ..وشوي الا
ويمر وانيت من القدام (هايلكس 2010) وفييه بنات متلثمات ومنزليين الدرايش
ومشغليين جلسة لاحلام راعي المعارض وواحدة منهم تصارخ يام الطيران يا احلام
لك الله ياشهيدة الفن ...وش شهيدة وش القصة احلام ماتت قالوا لي ايه قلت لهم
وشلون قال الله يرحمها من كثر ماتعاطت الديرم ...قلت الديرم اشوا تعرفون
الديرم قالوا ايه اجل تحسبنا قراوا عندك ديرم تبيع..قطعه ولاجرامات ..قلت ليه
تسالوني روحوا للسوق....وتضحك اللي تسوق تقول لي تستخف دمك يالشيخ الديرم
ماده مخدرة تنفخ البرطم وتسبب التناحه منعته الداخليه ..قلت الديرم قالت اللي
شايله صورة احلام وكانت تصارخ أي والله جد انت وين عايش قلت لهم لامسافر
لامريكا وامس راجع ....وتضحك كانت جالسة ورى قوية قوية اجل امريكا ,,,قلت ايه
,,,قالت امريكا قاره أي دولة رحت ...ضحكت عليها وقلت الله يخلف عليك امريكا
يعني الولايات المتحدة الامريكيه ...ويرد علي صوت غريب ...بنت دافورة بنظارات
تقول لي معلوماتك صحيحة جابوا طاريها في برنامج من سيربح المليار امريكا دولة
انتهت قبل 217 سنة وصارت مكانها 166 دولة فيها اللي شيوعي وفيها الليبرالي
...ناظرت لها قلت اهم شي ان الامن مستتب هنا ولا انقسمنا قالت وش تقصد ؟؟قلت
لها الله يخليك ما اقصد شي بس ممكن خدمه.. قالت لي ائمر قلت ابي اروح الجامعه
حفيدي قصدي قريبي يدرس هناك وتدلني على محطة
above ground
وتقول لي اركب القطار رقم 9 ...والمهم واروح للمحطة واركب القطار واوصل
للجامعه.
واوصل للجامعه وياسبحان الله الجامعه زي ماهي ماتعيرت بشي الا
صارت كل المواقف لسيارات الدكاتره والفي أي بيVIP
يعني الطلاب مدري وين يوقفون
امهاتهم واخواتهن السيارات على كذا وتوني امشي في بهو الجامعه الا وش اشوف مو
معقول بالمره...
5 دكاتره يلاحقون طالب ..الاول يقول له واللي يرحم والديك
ادخل الاختبار وماعليك اضمن لك بتنجح لو تبي
B+بس
وافق والثاني يقول له ياخي ماعليك حتى لو غيابك فوق 66% عادي بس لاتضيقها
علينا الله يخليك قل تم اما الدكتور الثالث القصير يقول للطالب باعطيك
A+
بس انت وافق قل تم علشاني تكفى
لاتردني ..والطالب يقول لهم لا يعني لا انا باحول للطب هناك الدكتورات من
يشوفون ولد داخل عليهم ينجحونه قبل مايسالونه عن اسمه مو زيكم هنا ..اما
الدكتور الرابع يقول لطالب ..تزعل علينا ليييه ليه واحنا عملنا لك ايه....والخامس
يقول الله يخلي لك ابوك و امك استر علي الله يستر عليك ترى الشعبه اللي عندي
هج منها طالبين يعني تغيب انت واتعرض للمسائله صدقني ياولدي ياحبيبي اني
محضرك كل المحاضرات ..ويلتفت عليه الطالب ويقول باحذف من مادتك وورني بالله
وش بتسوي ورني ولا انت خايف صدق دكاتره مايستحون على وجيههم...
ياربي هذي الجامعه اللي اخبرها ولا في شي صاير في الدنيا...واقرا
لوحة الاعلانات الا اعلان طويل عريض ..اعلان اضراب عام ابتداء من يوم السبت
القادم اعتراض على قرار مجلس الوزراء بزيادة مكافئة الطلاب الجامعيين من 4000
ريال شهريا الى 5000 ريال بس...ومكتوب تحت في نهاية الاعلان وين نطر منهم
يوم يخلونه 5000 يا ريال 10000 يابلاش هذا اللي ناقص ...رحت انادي واحد من
السيكورتي يقرا لي الاعلان يمكن انا ما اشوف قال لي السيكورتي تصدق العام
مسوين اضراب مرتيين مرة علشان يبون مكافئة العيد ويوم علشان يبون راتب شهر
زيادة في الصيف خبرك طلاب وصيف وسفر ومصاريف...قلت له عجيب والله تطور
بهالجامعه ويقول لي السيكورتي اسكت بس الطلاب مبهذلين الجامعه قلت له خير بعد
قال لي البنات مقمين عريضة السماح بالاختلاط لانهن يقولون مشوار الواحدة توصل
اخوها في الدرعيه بعدين تروح لجامعتها في ديراب وهم بصراحة ما يامنون على
اخوانهم في قطارات ال
above ground
لان في بنات شوارع للاسف يضايقون الشباب .وبيطلع القرار بشان الاختلاط عن
قريب انشاءالله قلت له يالخبيث ودك بالبنيات قال لي الله يسامحط والله ماني
من الاولاد قليلين الادب بس زوجتي سيكورتييه في جامعة البنات ومشوار عليها
توصلني لهنا من الفجر تصدق اني اركب في باص نقل معلمين مع اني سيكورتي ..قلت
ماشاء الله وزارة المعارف وفرت باصات للمعلمين ويضحك علي قال الله يهديك قصدك
الرئاسة العامة لتعليم البنين ..بس لا مو كذا القضية اني اركب في جمس ام مطلق
لتوصيل المعلمين بس يعني بغيت اكشخ قدامك...قلت اجل ام مطلق قال ايه ليه
تعرفها ..قلت له لاوالله بس بغيت منك خدمة ياخي قال امر قلت له لي حفيد
...ويقول حفيد لك (رحت لهم وعمري 22 حشا مو بلاك هورس الهام شاهين) قلت له
امزح معك اقصد قريب لي ...قال اسامي الدكاتره وعناوينهم تلقاها فوق في ادارة
الموظفين ...ورحت لفوق زي ماقال لي ...وادخل على موظف محترم وحياوي ..الله
يذكر الجلوف اللي على وقتنا بالخير ..واسلم عليه وقلت له ابي اسئل عن دكتور
يدرس بالجامعه..قال لي ابشر بس وش اسمه..
قلت له .بلاك هورس العاشر طعش...وما امداني اخلص طعش الا
ويختبص الموظف ويطلع من المكتب ويقول لي اصبر شوي برجع وبعد هنيهه ما شفت الا
40 جنديه يحاصروني وماسكين ويكلبشون يدي ..وانا اسئلهم وش القصة ..ماسويت شي
والله ا ني بريء .الى الحين بعد 500 سنة وانتم تطقون بعدين تحققون...
ومادريت الا رئيستهم تكفخني بالعصا على راسي وماوعيت الا انا في مكتب
مظلم....
وقدامي نقيبه قد الدنيا فاكة ازارير قميصها الاربعه الفوقيين
والصدر مبين ..يخرب بيته قصدي بيتهم غيروا طريقتهم من التكفخ الى الاغراء
..وشوي الى تصرخ علي .
وش اسمك يامتهم وكم عمرك ومواليد وين؟؟؟
اسمي بلاك هورس الاول مواليدي 1978 م مولود في مستشفى
الرياض المركزي في شي ثاني بعد...
قالت لا ياشيخ يعني الحين عمرك فوق 470 سنة ومستشفى الرياض
المركزي العب غيرها يعني اذا بتكذب قل مستشفى صح مو مستشفى بيطري ..أي قسم
جناح الفيران ولا الكلاب والقطاوة ...
قلت استحي على وجهك عيب( تراها ماعطتني كف هنا لاتصدقون اللي
يقول لكم العكس) مستشفى الرياض المركزي من الصروح الطبيه بعد مدينة الملك فهد
الطبيه اللي مابعد افتتحوها ولا افتتحوها ..
قالت لي بالنسبة لمدينة الملك فهد انشالله قريب بيفتتحونها
اما الرياض المركزي فتراه مستشفى بيطري ....المهم وش علاقتك ببلاك هورس
العاشر طعش..؟؟؟؟ ولاتكذب ترا عندنا جهاز الكشف عن الكذب؟؟
قلت لها الله لايجيب الكذب بيني وبينك ...بلاك هورس العاشر
طعش ياطويلة العمر حفيدي (اح ماجاني طراق ثاني) والله حفيديي صدقيني عاد
وبدون طق لو سمحتي انا المفروض اني مت بس امر الله ..الا ممكن سؤال ؟
قالت لي اسئل واخلص ؟؟ بس قبل هات مفكرتك الاكترونيه اللي
تحوي معلوماتك كلها؟؟
قلت لها والله مامعي الا بطاقة احوال ومصورينيي وصورتي فيها
الله لايوريك مو ادمي الا واحد مروع بس بلاك هورس العاشر طعش الله يصلحه وش
مسوي ..يعني قاطع اشاره ولا داعس قطوة ولا ايش...
قالت ولدك منقلب على النظام ...يكتب نشرات يدعو فيها الى
تحرير الرجل وافكار سيئه مثل قيادة الرجال للسيارات وحرية الاختلاط ويدعو الى
ماهو اعظم ..والعياذ بالله ..يالله لاتفتنا في ديننا .
قلت وش سوا بعد ....لاتقولين انه تكلم على ........ ترى والله
لو قال شي في حقهم اني لاجلده بنفسي ..
قالت لاماوصلت الى هالحد بس يقول ان الرجال قوامون على
النساء خير عسا ماشر ومن هالمطلق يدعو الى ان تكون عصمة الزوجيه بيد الرجل
بالذمه هذا حكي...بالله قريبك هذا وش يبغى..
قلت لها بيد الرجل ..لا لا لا اكيد انهبل ..بس اوعدكم اني
اعقله لكم...انتم قضبوني اياه واوعدكم اني اعقله لكم بس طلعوه ...
قالت لي..للاسف كان محبوس لمدة شهر بس انه انحاش ..ومازال
البحث عنه جاريا ..عيني في عينك ماتعرف هو وينه الان؟؟قول الصدق ترا تسترك
عليه بيوديك في داهيه؟؟؟
قلت لها قسما بالله العظيم اقسم بالله يمين بالله ماعرف
وينه بس اوعدكم اني ادوره لكم بمجرد انكم تطلقوني قصدي تطلقون
سراحي...وبالفعل تم اطلاق سراحي,صباح اليوم الثاني مقابل غرامة قدرها 20000
ريال مؤجله....
طلعت من مقر المباحث ..وفي راسي اني ابحث عن حفيدي بلاك هورس
العاشر طعش.
من الروعه اللي فيني ركبت مع اول باص مر بي ..وتوني حاط رجلي
صرخت فيني السواقه انت يارجل استح على وجهك تركب مع حريم مانت خايف على روحك
ترى هنا عاملات وحريم ماشافوا رجالهم لهم فترة انزل الله يصلحك ..وانزل والقى
وانيت عليه بنيه يجي عمرها 23 سنة وتنزل الدريشة (حسبتها بتعطيني رقم زي باقي
البنات اللي شفتهم) الا وتقول لي توصيله يالشيخ ..قالت ياليت ..قالت بعشرين
ريال ..قلت ان بغيتي مية وافتح الباب الامامي وتصرخ علي انت صاحي يالشيخ وش
تبي الناس يقولون عني مركبه رجال قدام عندي اركب ورا بس ..وبالفعل اركب وزي
العاده انا +بنت =ما انعطى وجه قمت اسولف معها قلت لها الا انتي ليه ياحلوة
ماكملتي دراسة ...الا وتكرها ضحكة قالت الله يخلف عليك معي ماجستير في انظمة
الحاسب ..قلت لها طيب ليه تكدين على وانيت ..قالت يدي على يدك وانا لقيت
وظيفة وقلت لا تصدق بالله لي اربع سنين ادور وظيفة ولا لقيت الدوله مكتفيه و
طالعين بطلعه جديدة يقولون نصدر موظفين للخارج والقطاع الخاص يتميصل ..ضحكت
عليها قلت وشلون يتميصل قالت يا يعين البنت مننا سيكورتيايه ولا على السنترال
عن قولة ماسعودنا .ولا عينوا شباب في بيوتهم وقالوا ندعم حقوق الرجل والله شي
يقهر مو .....قلت على طاري حقوق الرجل ماتعرفين بيت عائلة بلاك آل هورس
...قالت ايهم .لايكون الدكتور المهبول اللي هاب بحركة حقوق الرجل وحرية الرجل
..ولاقصدك بلاكية بنت بلوكة مراة الاعمال المشهورة ..(جا في بالي وقتها انها
من احفادي) واروح لبيتها قصدي قصر بلاكيه وادخل هناك ووش اشوف.
بالصدفة البحته كانت عندهم مناسبة خطبة وزحمة وناس ..ولا
الحريم يسولفون مع بعض ومعهم الخطيبة وهي جاية تتقدم لخطبة الولد ويتفقون على
المهر وتقول ام البنت ترى يا فم فلان (الخطيب) نبي الرؤية الشرعيه ..زتقول
يا حسام جب العصير للضيوف ويدخل حسام ربي يحرسه من العين وهو يرتجف وعظامه
تنافظ ولايقدر ينطق ومنزل راسه للارض ويقدم العصير للضيوف وتقول الخطيبة له
::بسم الله ماشاء الله تبارك الله احسن الخالقين ...انا في حلم ولاعلم وش صار
في الدنيا ...وانادي حسام ويجيني يحسبني اخو الخطيبة ..ويجيني مسرع وهو يناظر
الخطيبة من ورى الباب قلت حسام تدري انهم يخطبونك ويقول لي يووه عاد تراني
استحي قسما بالله لاطلع لغرفتي فوق بس عاد..قلت له لا ياحبيبي الله يتمم
بينكم بالمعروف بس ابي منك خدمة قال امرني .قلت له ارفع ثوبك ويحمر وجهه ليه
.. قلت له بس ابي اشوف سرك ارفع عاد اختي موصيتني تبي تتاكد وتوه يرفع ثوبة
واستغل الفرصة........(مقطوع رقابيا)........ ياربي ماتغير شي اللي عندنا من
اول عندهم بس ليه كذا ..وما شفت لكم حسام الا صاير وجه احمر وحالته حاله ورقى
على غرفته فوق طيران....وانا بعد طرت على الشارع ..بصراحه ماني مستوعب وش
اللي يصير من حولي ياربيه احس اني مسطل بس مبطي ما شميت شراب ... وانحاش
للشارع وانصا اقرب تاكسي.
و فعلا ركبت مع تاكسي وقلت للسواقه ..لو سمحتي شارع التخصصي
..قالت لي سم اخوي تستهبل انت وين شارع التخصصي قل شارع موجود مو تستخف دمك
ماني رايقة لك على هالظهريه ...قلت لها شارع التخصصي اللي عليه العزيزية
واليورومارشيه ماتعرفينه قالت وش تخربط انت الاخ مديرم ولا مكورث (نسبة الى
الديرم والكراث) وين الشارع اللي تقول عنه ...قلت لها اللي يوازي طريق الملك
فهد على اليسار قالت لي آه قصدك شارع الاميره الجازي بنت نورة بنت لطيفة ..
قلت وشو وشو بنت صرتوا تسمون الناس بامهاتهم ..قالت خير اجل وش نسميهم باسم
من ... انت وش اسمك ..قلت لها اسمي بلاك هورس بن انترنت المتصفحي من كبار
العوائل الالكترونيه ..قالت لي اذا سالوك عن اسمك قل بلاك هورس بس لايفهمونك
غلط زين ...قلت لها ابشري ..بس ياليت تسمعيني ابو نورة الله يخليك قالت ايش
ايش قلت محمد عبده ..قالت اووه شكلك تحب الاثار وتعرف محمد عبده خفت اقول
لها سالفتي تنهبل .لعبت عليها قلت انا مهتم بالموسيقى قالت اجل باسئلك محمد
عبده لاحق على طلال مداح ولالا ..قلت لها لا طلال قبلك يامحمد عبده بمية سنة
..قالت والله شكلك علامه الحين عمرو دياب موب صحيح انه اول من ادخل الة
العود لمصر وانه كان استاذك يا سيد درويش ..قلت لها افا عليك عمرو دياب علامة
موسيقي وهو اول من ادخل التخت الشرقي ..بس الله يرحمه عقب اغانيه جانا سيد
درويش وبلحيته اللي كنها تيس واغاني سفلئة ..قالت لي على فكرة قدامك تلفزيون
صغير اختار القناة اللي تبي من بين 200 قناة ولاني انسان وطني فتحت على
التلفزيون السعودي ولا نشرة الاخبار وسبحان الله هي هي استقبلت وودعت وهنئت
وتهنئت ...ماتغير ابد ...وتوني ارعص (اضغط) زر المشروبات الا والسواقة تمسك
فرامل واسئلها خير ..قالت شف شكلك ولد ناس صراحة ماني فاضيه ادخل شارع
الاميرة الجازي بك ..بصراحة البنات اللي هنا ما يخافون الله يجلسون يحددون
فيني ومغازل وترقيم انزل هنا وكمل باقي المشوار بروحك..وانا احاول اقنع
فيها بس ماقدرت ..واخرتها نزلت وكملت مشي في شارع الاميرة الجازي ومن شدة
الجوع صرت ادور مطعم بس كل المطاعم يا للبنات يا للعوايل وممنوع دخول
الشباب بدون محرمة ياربيه من وين اجيب محرمة وانا ضايع في هالزمن وامشي
وامشي,, واخيرا والقى كوفي شوب فاتح ولافيه هاللوحه وادخل الا بنيات كثر
التراب ودخان وعجه ..وتوني داخل ومسمي بالله وحالتي حاله ازارير العلوية
مفتوحه ..الا والبنات اللي في الكوفي شوب يصفرون و يصارخون واللي تقول لي
امووت واللي تقول لي واويلااه امووت ياهوو ...واللي تقول ياعينيي يلعن ام
الشعر في صدرة بسك اغراء ..وطبعا شاب مثلي بعقلية عام 2001 قلت لهم لا وفي
رجلي شعر تبون اوريكم وارفعي ثوبي واطلع كراعيني وعينكم ماتشوف الا النور
ارقام وبنات يلمسون سيقاني بايديهم) (نداء الى كل شباب 2001 اذا تقدرون
تجون لاتفوتون الفرصة ترا بناتهم شي وسهلات مرة ومطافيق) وشوي الا ويتغيفلون
اللي تشتغل في الكوفي شوب ويجلسوني معهن في اقصى المحل بعيد ويقولون لي وش
تشتهي تشرب ياقمر ..عاد تخيلوني في جلسة مع اربع بنات انواع الخقه قلت لهم
كابتشينو بس تكفى خلوه يكثر الرغوة .. وضحكن قالن تقصد يكثر الشمبانيا قلت
من قال شمبانيا لاتوهقونا ..قالوا لي وش فيها الشمبانيا مسموحه عندنا بجرعات
معينه اكتشفوا انها تضيف نكهه للطعام والمشروبات ولافيها ضرر قلت بس حرام
..قالوا حرام ليه قلت تدروخ قالوا طيب اللبن يدروخ يعني حرام ..قلت المهم
الشمبانيا ممنوعه ولالا ..قالوا لا طبعا خذيت راحتي وسئلت عن البلاك ليبل
والبكاردي والويسكي والبيره ,,ماشاء الله كلهم سمحوا بهم والله البلد تطورت
من بعدي قلت لهم اجل قولو لها لاتمي الكوب بالكابتشينو النص يكفي ..ورحت املي
نص الكوب الباقي بالنكهات لين امتلى وصرت اشرب والبنات يضحكون ....وشربت لي
على ذي الحاله 10 اكواب كابتشينو و8 اسبريسو واربعه شاهي بدون حليب ..ويا
محفوظين السلامة مامرت خمس دقايق الا بديت اتاغر من جد وعقلي راح (يرحم عام
2001 و شمشمة البتكس وشم البنزين قبل مايخففونه ) الحين تسكر وبموافقة
الحكومة ...
المهم وانا طاير في العلالي بديت اخذرف وارقص واقول انا قدع
انا بمب هع هع هع انا حلو وطووووويل ..وقمت افصخ ثوبي واوري البنات شعري اللي
في يدي وصدري وسيقاني وطلعت ركبتي للبنات (ركبتي زي ماهي شهبا ومقشهر) ونص
البنات يوم شافوا ركبتي استخفوا,, اللي تصارخ واللي صارخت ابي اروح الحمام
واللي تقول ما استحمل خلاص احرقتنا الله ياخذ عمرك...ولا قنوات لبنان ارفق
علينا يخرب بيتك..وشوي الا البنات اللي معي خذوني معهم وركبوني في الجمس
=الصالون حقهم (صوالينهم 3 متر في 3 متر) ومضلل وانا اسئلهم وين خلونا هنا
حلوين ..نشكرب كابتشينو وحليب وشاهي ليه نروح بس ..وهن يقولون لي لاتخاف
بنروح قريب لاتخاف ونطلع طريق وبعد 300 كيلو وصلنا لاستراحه وانا بعييد عن
الارض حيل مدري وش يصير حولي واللي تقول لي ماكن فانيلتك مثقله عليك يابعد
عمري واقول لها ... الا وش دراك انتي رهيه ..وترد خويتها وسروالك الطويل بعد
شكل مقيد حريتك ...واقول لها انتي بعد رهيبه مابقى الا الشورت وتو الثالثه
بتحكي الا ضابطات المباحث يداهمون المكان ويهجمون علينا والبنات يبون
ينحاشون وانا صاير اتنطط في مكاني هييييييه علشاني علشاني كل هذا علشاني
والضابطات يمسكوني ويغطوني بلحاف ويقولون ياقليل الادب وين اهلك عنك اللي
رضوا انك توصل لكذا ..وانا اقول شرف الولد زي الولاعه اذا شبت مرة تشب دايم
هع هع هع وكن حكيي ماجاز لهم و17 طراق ويودوني للقياده وهناك بديت اصحصح ولا
اشوف خويتي اللي حققت معي من الاول ...وزي العادة استقبال حار
طرااااااااااااق ..تعرفون وش رديت عليها ...قلت لها آآآممممووواااه واسبل
بعيوني واغني لها هنني ياللي جميعي لك هنا ضمني لاخر فضاي وتعطيني طراق ثاني
واقول لها يسلم لي صدر الداخليه كله بعد لاتخلين في صدرك قصدي في قلبك علي
شي الا سويه فيني عادي ... و ترررررش سطل موية في وجهي ولااصحى ويبدى التحقيق
الصدقي وش طلعك مع البنات؟؟ واضحك من هالسؤال بالله تسالون ولد جاي من الرياض
عام 2001 وش مطلعك مع بنات غربلكم الله من اول اذا ضاقت فينا الارض ركبنا ضب
جنبنا وقمنا نحاكيه على انه بنت ماتبيني الحين اطلع مع بنات ..وتسالني واحدة
منهن اقصد العسكريات ..يلعن شكلك ماعندك شرف ولاغاريه على نفسك ماتستحي
ولاتخاف على سمعة اهلك ولا انت ولد ليل ...واضحك اهلي لا اتحاد ...انا مو
ابن ليل انا ابن آوى هع هع هع (ماقلت لكم مقلع) ..وتقول نقيبه لرئيستها وش
نسوي به نرسله للسجن ..والاخرى تقول نجلده 200 جلده وشوي وهن يتناقشن ..ويجيهن
تليفون من واحدة كبيره في وزارة الداخليه ..ويسكتن كلهن ..وتقول رئيستهن
القيادة العليا تبيه ..وارد عليهاالقيادة مثلكم حريم ولارجال ..قالوا طبعا
حريم اجل وش تتوقع.قلت ان الله حتى القيادة العليا تبيني وينتس يمّه تشوفين
ولدك حتى القيادة ميتة عليه. ....وياخذوني في سياره فخمه ..وادخل مكتب بيضاوي
وفيه واحده مدورة بعباتها ..يعني دبه....
قالت لي: انت بلاك هورس الاول ؟؟وحفيدك مدري قريبك بلاك هورس
العاشر طعش ؟؟
قلت لها ايه يامدور ياحلو ياقميل ياقطعه ...ويجيني بوكس وتقول
لهم خلوة ...شكلها فكت معي تبيني. (سكران ويحمل معه ذكريات عام 2001 يعني
لاتشرهون عليه)
قالت لي ..انت تدرك وش انت مسوي وش الفعل الفاضح اللي مسكناك
فيه ؟؟ولالا ترانا مسجلينه بالفيديو ؟؟
قلت لها عقبال مانسجل معك شي ياحلو ياثقيل ما يمصع قلبي الا
حبك يامدور ياكايدهم...حلاتك في البال سيكام ؟
قالت لي انت الى الحين مانت في وعيك ؟؟؟زين واشرت لهم خذوه
وبالفعل اخذوني ..الى قسم الدباغه والطبع وصحصحوني وصحوا معي جد ميت لي من
الفين سنة ..الله يحفظهم لشبابهم وسائلهم متجدده. دائما..ومادريت الا انا في
استديو تلفزيوني ولا استديوهات هوليود و كننا في استراحه ..وصوروا فيلم مدته
ربع ساعه انا اطلع في كل مشاهده بالشورت ومعي كاس والله طول الوقت احسبه
سيدر لانهم قالوا لي لاتشرب منه ..مايندرى عن وقتهم يطلع السيدر حرام عندهم
..وكل شوي احسب اني باصير نجم سينمائي ولا يصورون فيلم وثائقي وبكرة الناس
ياشرون علي....وتونا مخلصين الفيلم الا يرجعوني للسجن للاسف ...طلع فيلم
تشهير بحفيدي بلاك هورس العاشر طعش ..والهدف النيل من سمعته..
بثوا الفيلم في نشرة الاخبار يصوت المذيعه ماجدة الاسد بعد
استقبل وودع وهنا ويقولون قبضنا على بلاك هورس الاول جد بلاك هورس العاشر طعش
..انظروا الى انسابهم ومبادئهم ومن أي عائلة انحدر هذا المعارض ...ورداءة
التفكير ..يابلاك هورس العاشر طعش اتريد ان تنحل الرجاجيل كما انحل جدك وانت
وان يكونوا مثلكم ..ايها الجبان النذل العفن النتن المنحاش اطلع للناس اذا
كنت رجل بمعنى الكلمة فاظهر للعامة......................وماهو الا شهر ويطلع
حفيدي بلاك هورس العاشر طعش للعامه وسلم نفسه للسلطات وصرنا انا واياه ..في
سجن واحد بصراحه اول مرة احس اني مستحي من احد مثل ما استحيت من حفيدي ...حسيت
اني بيدي ساهمت في هدم سيرة عائلة بلاك هورس وانا اشوفه يطلع في التلفزيون
ويعترف انه كان غلطان وان الحكومة على صدق وانه مستعد يقبل أي فتاة تتقدم
لخطبته ...اهيء اهيء عرفتي اني وقتها ضيعت عايلتي بيدي....وقمت اقول ياليت
هالكتاب جاا لبلاك هورس الثاني ولا الثالث ولا ما جا لاحد ابد وياليت مافركت
الخاتم ولاجيت لهالوقت وجنيت على فلذة كبدي العاشر طعش..والله لو اشوف
هالعفريت ابن الكلب اللي جابني هنا اني لاجلده.
تتغير الازمان وتبقى الوسيلة الوحيدة اللرد والنقاش هي الطعن
في الشرف والاصول... ومهما كان ومهما صار موضوع الخلاف والنقاش ...نجد ان لكل
قضة فكريه ضحاياها من اللذين ليس لهم ذنب في الحياة سوى انهم حاولوا فتح
موضوع النقاش في موضوع ما...فيما ان الذات الالهية والاصول الدينية هي
الاشياء اللتي لايقبل فيها جدال ..نجد ان للاخرين سلسلة من المحرمات في
النقاش الفكري...في لااخير لاتفهموني غلط بليييز........بلاك هورس الاول
|